Os bispos galegos celebran a elección de León XIV
Valoran o seu pasado como misioneiro e como bispo dunha diocese pequena no Perú
O camiño empeza agora, pero para os bispos galegos os primeiros xestos de León XIV foron definitorios.
"Os bispos temos unha percepción da Igrexa moi unida ao pobo, á nosa diocese. E sentir que ese nexo é importante para el di moito", dixo monseñor Alfonso Carrasco Rouco, bispo de Lugo.
Non pasa inadvertido o feito de que o papa teña dobre nacionalidade, norteamericana, onde naceu, e peruana, onde desenvolveu o seu labor pastoral durante corenta anos. Dúas realidades dispares, no continente con maior número de católicos do mundo.
"O concepto que tiña do cardeal Prevost é o dun home próximo e bo. Pasou moitos anos de misioneiro e coñece as dúas realidades de América", di monseñor Leonardo Lemos Montanet, bispo de Ourense.
Sobre a liña que seguirá León XIV tamén deu pistas.
"Polas palabras que dixo onte parece que vai ser continuísta. Tamén hai que ter en conta que o cardeal Prevost era un colaborador do papa Francisco, así que é posible que siga o seu legado, pero á súa maneira", dixo monseñor Antonio Valín, bispo de Tui, Vigo.
No horizonte, a esperanza de que León XIV siga os pasos doutros papas e visite Galicia durante o seu pontificado.
