O papa denuncia no Perú a explotación da Amazonía e o asasinato de líderes indíxenas

O papa León XIV denunciou este domingo a explotación da rexión da Amazonía e condenou o trato que reciben as comunidades indíxenas co asasinato dos seus líderes, os abusos sexuais e o abandono das institucións.

Nunha das xornadas máis esixentes da súa viaxe, tras pasar a mañá no Cusco, a 3.600 metros sobre o nivel do mar, trasladouse a Pucallpa para celebrar un acto, dixo, seguindo as pegadas do papa Francisco na súa "inesquecible visita a Puerto Maldonado" para soster os pobos amazónicos "na busca da xustiza e da paz, que tanto necesitan estas terras".

No Malecón de Yarinacocha, a turística lagoa da cidade de Pucallpa, xunto ao río Ucayali, afluente do Amazonas, León XIV asistiu a bailes e cantos tradicionais das diferentes comunidades e escoitou as duras reivindicacións dos líderes indíxenas.

Pero o papa que pasou 20 anos no Perú, como misioneiro e despois bispo de Chiclayo, constatou que, "lamentablemente, a voz que hoxe emerxe destes lugares fálanos de feridas que non só non sandaron, senón que mesmo se agravaron".

"O berro da terra e o berro dos pobres érguense conxuntamente, desenmascarando lóxicas de mercado e de explotación que poñen en risco o propio equilibrio da creación", dixo citando a encíclica Laudato si' de Francisco.

E condenou que para eles "mesmo defender a propia casa pode custar a vida" e que, "nos últimos anos, moitos líderes indíxenas foron asasinados por teren protexido os propios territorios".

Desde 2013, cando foi asasinado o líder Mauro Pio Peña en Junín, a Asociación Interétnica de Desenvolvemento da Selva Peruana (AIDESEP) contabiliza 37 líderes indíxenas asasinados. A organización sostén que os crimes están relacionados coa defensa dos territorios fronte a actividades ilegais.

"O sangue destes irmáns clama a Deus e reclama xustiza aos homes", engadiu.