Os arxentinos van ás urnas este domingo nunhas eleccións lexislativas clave para Milei
Estas eleccións realízanse nun momento de gran polarización entre o partido de Milei, La Libertad Avanza (LLA), e o peronista Fuerza Patria
Case 36 millóns de persoas están chamadas ás urnas: o voto é obrigatorio entre 18 a 70 anos e optativo para os cidadáns de 16 e 17 ou maiores de 70
Os colexios electorais estarán abertos desde as 08:00 hora local (11:00 GMT) e pecharán ás 18:00 (21:00 GMT).
A Arxentina celebrará este domingo eleccións lexislativas nas 24 provincias do país para renovar parcialmente a composición das dúas cámaras do Congreso nacional. Estes comicios son clave para as ambicións do Goberno de Javier Milei, pero ademais medirán o grao de apoio que ten entre a cidadanía a pouco de cumprir a metade do seu mandato.
A cita electoral realízase nun escenario de gran polarización entre o partido de Milei, La Libertad Avanza (LLA), e o peronista Fuerza Patria.
Votar é obrigatorio para os cidadáns de entre 18 e 70 anos
Case 36 millóns de persoas están chamadas ás urnas, nun país no que o voto é obrigatorio para os cidadáns de 18 a 70 anos e optativo para os de 16 e 17 ou maiores de 70.
Os colexios electorais estarán abertos desde as 08:00 hora local (11:00 GMT) e pecharán ás 18:00 (21:00 GMT).
En todos os distritos electorais da Arxentina votarase para renovar 127 escanos da Cámara de Deputados, sobre un total de 257.
En paralelo, a cidade de Bos Aires e as provincias de Chaco, Entre Ríos, Neuquén, Río Negro, Salta, Santiago del Estero e Tierra de Fuego votarán para renovar un terzo do Senado (24 dun total de 72).
A nova composición do Congreso será inaugurada o próximo 10 de decembro.
Os colexios electorais abriron este domingo ás 08:00 hora local (ás 12:00 hora de España). Reuters
Obxetivo de Milei para soster os seus proxectos
O obxectivo do oficialismo nacional, que conta actualmente con menos de 40 deputados, é lograr un terzo das bancas da cámara baixa e obter todos os escanos posibles no Senado, co fin de soster os seus proxectos de reforma e contrarrestar os intentos da oposición para bloquear decretos presidenciais.
Jorge Milei durante un mitin nesta campaña electoral. Foto: Reuters/Cristina Sille
Obxectivo do peronismo
Para o peronismo, un triunfo permitiríalle consolidarse como a principal forza opositora ao Goberno de Milei, o que supoñería un empuxón a este movemento político tras o desprestixio sufrido durante o mandato do expresidente Alberto Fernández (2019-2023).
Cartel electoral de Fuerza Pattria: Imaxe Julieta Barrera / Reuters
As enquisas non ofrecen unha tendencia clara sobre o posible vencedor
As diferentes enquisas non ofrecen unha tendencia clara sobre quen se impoñerá nos comicios, aínda que sitúan en terceira posición a fronte Provincias Unidas, liderada por un grupo de gobernadores de distintos partidos, e en cuarto lugar a Frente de Izquierda e los Trabajadores (FIT).
O peronismo rexistrou o 7 de setembro un importante triunfo nos comicios lexislativos provinciais no maior distrito electoral do país, a provincia de Bos Aires, que concentra preto do 40% do padrón.
A provincia de Córdoba, o segundo distrito en poboación, será escenario dunha disputa entre LLA e Provincias Unidas, mentres que en Santa Fe as medicións mostran un triplo empate entre o partido de Milei, o do gobernador local Maximiliano Pullaro e o peronismo.
Na cidade de Bos Aires, distrito electoral independente da provincia homónima, a poxa será entre a lista encabezada pola ata o de agora ministra de Seguridade Nacional, Patricia Bullrich, e os candidatos de Fuerza Patria.
A participación electoral será outro factor importante: nos comicios provinciais celebrados nos últimos meses para renovar as lexislaturas locais, a concorrencia baixou de forma significativa respecto a anos anteriores.
Nesta elección entrará en vixencia o uso a nivel nacional da boleta única de papel, un formato novo para o país no que todas as forzas aparecerán nunha única papeleta.
A lei electoral establece que os primeiros resultados oficiais do escrutinio provisional sexan difundidos a partir das 21:00 hora local (00:00 GMT do luns).
Cartel do principal partido da oposición. Reuters
Os correspondentes estranxeiros denuncian trabas para cubrir as eleccións lexislativas
A Asociación de Correspondentes Estranxeiros da República Arxentina (ACERA) denunciou este sábado impedimentos impostos polo partido do presidente, Javier Milei, á cobertura xornalística estranxeira das eleccións lexislativas que se celebrarán o domingo no país.
Nun comunicado difundido en Bos Aires, a entidade, que representa máis de noventa xornalistas de medios internacionais e conta con máis de corenta anos de traxectoria, expresou:
"A súa enérxica preocupación e protesta ante os obstáculos impostos polo oficialismo para a cobertura das eleccións lexislativas do domingo 26 de outubro".
Segundo explicaron, varios xornalistas estranxeiros foron informados este sábado de que as súas acreditacións foran denegadas, revogadas ou canceladas sen xustificación e non poderán ingresar a lugares clave para a cobertura, como o búnker do espazo oficialista, La Libertad Avanza.
"Un número significativo dos nosos colegas viu bloqueado inxustificadamente o acceso ao búnker de La Libertad Avanza, o que os impedirá cumprir co seu deber profesional de informar con transparencia e oportunidade", afirma o texto difundido.
A organización afirmou tamén que o ocorrido "constitúe unha clara vulneración do dereito para informar e da liberdade de expresión, e limita a capacidade da prensa internacional de reflectir de maneira adecuada o proceso electoral arxentino".
Cualificou de "inaceptable" que se utilice "o argumento de "falta de espazo'" para restrinxir o acceso dos correspondentes.
.png)
Javier Milei votando nos comicios lexislativos de 2023, nos que foi o vencedor
