Os afectados polos incendios xa poden solicitar as axudas da Xunta
As 16 oficinas itinerantes da Xunta de atención aos afectados polos incendios están operativas dende este luns 1 de setembro
Os afectados poden acudir a estas oficinas para axilizar e resolver dúbidas sobre a tramitación das axudas
Todos os afectados teñen acceso a elas e non hai un límite orzamentario
Xa están operativas as 16 oficinas itinerantes da Xunta de atención aos afectados pola vaga de incendios. Estes poderán acudir ás oficinas para axilizar e resolver dúbidas sobre a tramitación das axudas.
Este paquete de medidas entrou en vigor o luns 1 de setembro. Os trámites deberán facerse vía telemática, pero xa está todo en funcionamento para que quen queira poida achegarse ata as oficinas para pedir información ou solicitar axuda.
"Aquí estamos para informar a quen necesite. Dámoslles as explicacións necesarias para a tramitación, contías e o que recolle toda a orde das axudas", afirma Alejandro Martín Rois, axente territorial Distrito III.
Dentro deste paquete destacan, entre outras, as axudas para a reconstrución das vivendas que sufriran danos a causa dos incendios: ata 139.000 € en caso de vivenda habitual ou permanente, e ata 66.000 €, en caso de segunda residencia. Tamén as achegas relacionadas coas explotacións agrogandeiras e forestais, cos centros produtivos e negocios afectados ou cos Tecores e as indemnizacións por danos físicos ás persoas.
A conselleira de Medio Ambiente e Cambio Climático, Ánxeles Vázquez, apuntou tamén que o obxectivo da Xunta é chegar ao máximo número de beneficiarios e que as axudas non teñen un límite de importe total.
