Once anos de cárcere por violar unha amiga logo dunha noite de copas en Santiago
Deberá indemnizar a vítima con 50.000 euros
A vítima, "despois de ser levada á súa casa polo acusado, sufriu agresións sexuais, a pesar da súa oposición verbal", recolle a sentenza
(Arquivo TVG)
A sección sexta da Audiencia Provincial da Coruña, con sede en Santiago de Compostela, condenou a once anos de cárcere un home como autor dun delito continuado de agresión sexual con penetración, coa concorrencia da circunstancia agravante de obrar con abuso de confianza, e outro leve de lesións, polo que lle impón unha multa.
En concepto de responsabilidade civil, deberá indemnizar a vítima, coa que mantiña unha relación de amizade, con 50.000 euros, informa o Tribunal Superior de Xustiza de Galicia (TSXG) e recolle o fallo.
Os feitos producíronse en 2024, despois de que ambos coincidiran nun establecemento de lecer en Santiago de Compostela e "tras unha noite de consumo de alcol, onde a vítima, despois de ser levada á súa casa polo acusado, sufriu agresións sexuais, a pesar da súa oposición verbal", recolle a sentenza.
Nela destácase a credibilidade da declaración da vítima, corroborada por declaracións de testemuñas e un informe psicolóxico que evidenciou o impacto emocional e físico dos feitos.
O tribunal, polo tanto, conclúe que os actos foron realizados sen o consentimento da denunciante e que o acusado abusou da confianza que existía entre ambos. A sentenza non é firme, pois cabe presentar recurso de apelación ante o Alto Tribunal galego.
