Ómicron multiplica por cinco as reinfeccións por covid
Das preto de 65.000 notificadas en España, case o 80 por cento rexistráronse dende finais de novembro, cando apareceu esta variante
A enfermidade cursa, na maior parte dos casos, de xeito máis leve
Ana María contaxiouse de covid por primeira vez en outubro de 2020. Soubo que era positiva nun cribado: "O último día do confinamento tiven que ingresar porque quedaba sen respiración. Estiven 7 meses de baixa e a consecuencia de todo iso tiven ansiedade. Non quería saír á rúa nin nada".
Coas secuelas aínda sen curar o pasado 22 de decembro daba novamente positivo: "Eu tiña frío e carraspeira, fixen o test de antíxenos e positivo. Chorei. Dixen non pode ser, outra vez".
Como Ana María hai preto de 65.000 persoas en España que se reinfectaron de covid, o 80 por cento dos casos rexistráronse no último mes e medio dende a aparición da variante ómicron.
"Ten unha mutación na proteína S que a fai con maior capacidade de infectar e de transmisión", explica María Bustillo, médica da Unidade de Enfermidades Infecciosas do CHUO".
Na maior parte das reinfeccións a enfermidade adoita cursar de xeito máis leve, como lle aconteceu a Ana María. "Os que pasaron o coronavirus ou están vacinados teñen inmunidade. Iso dalgunha maneira si que nos protexe de ter a enfermidade máis leve", salienta Bustillo.
Así e todo en determinados casos a enfermidade pode complicarse, por iso, insisten en que o importante é seguir protexéndonos para evitar os contaxios.
