O xurado declara culpable de violación e asasinato o veciño de Manuela Chavero

Quedou visto para sentenza o caso Manuela Chavero, a muller asasinada en Badaxoz en 2016. O xurado popular declarou culpable de asasinato e agresión sexual o seu veciño Eugenio Delgado. A fiscalía pide para el prisión permanente revisable. 

Tras nove horas de deliberación, o veredicto alcanzábase por unanimidade a medianoite. Conclúe o xurado popular que foi un asasinato, non homicidio, porque concorren aleivosía e asañamento, tamén coa agravante de xénero e que Eugenio golpeou a Manuela cunha violencia innecesaria. Declárano tamén culpable de agresión sexual.

Di o veredicto que Eugenio, ao que os expertos definen como sádico sexual, matou a súa veciña para encubrir a violación. 

Ademais, o acusado ocultou o seu cadáver enterrado nunha finca durante catro anos. 
"Cando toma conciencia do ocorrido, a única saída que viu foi matala. Todo o que pasou foi buscado. Nada fortuíto".

Máxima satisfacción das tres acusacións co veredicto. A defensa do acusado estuda recorrer. A fiscalía pide prisión permanente revisable e engade outro cargo por agresión sexual con extrema violencia, polo que solicita 15 anos máis de prisión.