O xuíz Peinado reclama a Begoña Gómez que acredite se usou o pasaporte só para viaxar á graduación da súa filla

 O xuíz Juan Carlos Peinado reclamou a Begoña Gómez, a esposa do presidente do Goberno, Pedro Sánchez, que «acredite» que utilizou o pasaporte unicamente para o que tiña permitido: viaxar ao Reino Unido para asistir á graduación da súa filla.

Así o fai nunha providencia deste luns, á que tivo acceso Europa Press, na que o xuíz instrutor do 'caso Begoña Gómez' sinala que «no pasaporte da acusada non consta ningunha dilixencia de saída nin de entrada nos días autorizados».

Peinado incide en que se levantou «de forma excepcional» a medida cautelar de retirada do pasaporte e prohibición de saída do territorio nacional.

«Requírase á mesma, a través da súa representación procesual, para que no prazo improrrogable de cinco días acredite que a dispoñibilidade do pasaporte obxecto de retirada e que lle foi entregado o pasado 8 de xullo foi utilizada para o concreto fin para o que se deixou sen efecto a medida cautelar», indica.

O instrutor quere pescudar se «non foi levado a cabo acto ningún que puidese ser constitutivo dun delito de quebrantamento de medida cautelar».

Un xuíz substituto, Antonio Viejo, foi quen autorizou a semana pasada a Gómez a viaxar á graduación da súa filla, pero non con Sánchez ao cumio da OTAN en Ankara (Turquía), e ordenoulle devolvelo este luns, despois de que o instrutor da causa lle retirase o pasaporte en xuño.

Peinado acordou retirar o pasaporte a Gómez no mesmo auto polo que a enviou a xuízo con xurado popular por presuntos delitos de tráfico de influencias, corrupción nos negocios, apropiación indebida e malversación de caudais públicos.