España alerta do risco de que se produza unha nova avalancha de migrantes o 23S

No medio da maior crise migratoria entre Marrocos e España, a embaixada española en Rabat lanzou unha campaña para desincentivar os intentos de entrada irregular aos enclaves españois de Ceuta e Melilla ante novas convocatorias difundidas en redes sociais para cruzar durante a xornada electoral marroquí, o vindeiro mércores.

"Entrar irregularmente en España a través de Ceuta e Melilla non dá dereito a acceder á Península, a permanecer en España nin circular libremente polo resto de Unión Europea", sinala a conta en X da Embaixada de España en Marrocos.

1/4
ℹ️Información importante:
Entrar irregularmente en España a través de Ceuta y Melilla no da derecho a acceder a la Península, a permanecer en España o a circular libremente por la #UE. pic.twitter.com/iRnHRtbByB

— Embajada de España en Marruecos (@EmbEspanaRabat) September 19, 2026

"Non te deixes enganar pola desinformación. A recente sentenza do Tribunal Supremo precisa o procedemento con quen accede por mar. Non modifica a Lei de estranxeiría. Non declara ilegal o rexeitamento en fronteira. Non impide o retorno", continúa a campaña, difundida tamén en contas dos diferentes consulados españois no país magrebí.

A iniciativa coincide con convocatorias aparecidas en redes sociais para un novo cruzamento irregular a Ceuta o próximo día 23, coincidindo coas eleccións lexislativas en Marrocos.

As redes sociais tiveron un papel fundamental na crise migratoria desatada en Ceuta polo maior cruzamento masivo na súa fronteira, máis de 70.000 persoas, o pasado 30 de xullo.

Aínda que o groso dos inmigrantes irregulares regresou a Marrocos, aínda seguen milleiros na cidade española.