O xuíz do caso Villa de Pitanxo cita a declarar trece mariñeiros do Playa de Menduíña 2

O xuíz da Audiencia Nacional que investiga o naufraxio do pesqueiro galego Villa de Pitanxo citou a declarar o próximo 30 de novembro trece mariñeiros do Playa de Menduíña 2, o barco que rescatou os tres sobreviventes da auga na madrugada do pasado 15 de febreiro e os trasladou a terra firme canda varios corpos atopados na auga.  

A Audiencia Nacional coordina desde o pasado mes de setembro a investigación despois de que o xuíz Ismael Moreno asumise de forma definitiva a competencia. Os maxistrados da Sección Terceira da Sala do Penal avalaron este mesmo mes de novembro a decisión adoptada o pasado 8 de setembro polo instrutor.  

Moreno xa tomou declaración ao patrón do pesqueiro Juan Padín como imputado, ao seu sobriño Eduardo Rial e ao mariñeiro Samuel Kwesi como testemuñas, ao seren os únicos sobreviventes do naufraxio.  

As investigacións xudiciais débense a que Kwesi ofreceu unha versión que contradí a exposta por Rial e Padín e que apuntaría a posibles neglixencias por parte deste último que desencadearían a traxedia.  

Tras escoitalos, o xuíz prohibiu saír de España a Padín, retiroulle o pasaporte e impúxolle as obrigas de comparecer cada quince días en sede xudicial e permanecer localizado. Agora é a quenda destes 13 mariñeiros, que declararán en Madrid a partir das 09:30 horas o próximo día 30. Todo iso despois de que estes contasen ante a Garda Civil o que os tres mariñeiros sobreviventes relataron nos momentos posteriores a ser rescatados.  

O pesqueiro galego Villa de Pitanxo naufragou o pasado 15 de febreiro a 450 quilómetros de Terra Nova nun accidente en que perderon a vida 21 dos 24 traballadores que ían a bordo do buque.