O Vilarreal encadea oito vitorias desde a derrota de abril en Balaídos

O equipo máis en forma de Primeira División, o Vilarreal, visita este domingo Balaídos (17:00). O equipo de Marcelino gañou os dous primeiros partidos do campionato, xogados ámbolos dous no campo da Cerámica. A iso hai que engadirlle as seis vitorias que logrou nas últimas xornadas da temporada pasada.

Non perde desde o 23 de abril de 2025, xusto cando o fixera en Balaídos.  Aquel partido disparara o Celta cara a Europa League. Estivo marcado pola expulsión de Bailly no minuto 37 cando o resultado era de empate. Despois chegaron os goles de Fer López, Borja Iglesias e Iago Aspas. 

A mesma secuencia de partido deuse no campionato anterior cando o Celta remontara o partido (3-2) no que comezaran adiantándose os castellonencos. "O Celta é un equipo áxil, dinámico e rápido, vainos esixir moito" asegurou Marcelino García Toral, adestrador do Vilarreal. "Tentaremos manter o noso balance ofensivo", ese que lles permitiu ser un dos cadros máis goleadores e que máis ocasións xeran en toda a Primeira División.