O Uruguai cuestiona a capacidade do estaleiro Cardama de construír patrulleiras oceánicas

O secretario da Presidencia do Uruguai, Alejandro Sánchez, dixo que hai moitos aspectos do contrato coa empresa española Cardama que xeran dúbidas e apuntou que o estaleiro non ten experiencia na construción de patrulleiras oceánicas OPV.

Así o asegurou este luns o alto funcionario do Goberno de Yamandú Orsi, quen brindou declaracións respecto do caso tanto nunha entrevista co medio local Topic Media como nunha conferencia de prensa á saída dunha actividade oficial.

"É un estaleiro que ten moitos anos, si, pero que non ten experiencia en construír este tipo de barcos, por tanto o que se está construíndo é un prototipo, con todos os riscos que implica construír un prototipo desta natureza", afirmou durante a entrevista.

Nun momento en que xa se produciu un intercambio de información dentro do proceso de mediación previsto no contrato como parte dos procedementos administrativos para a súa rescisión, e no que tamén se presentaron algúns descargos, Sánchez sinalou que existen moitos aspectos do contrato que lle xeran dúbidas ao Uruguai.

"Por exemplo, a Lloyd, que é unha certificadora moi importante internacionalmente, contrátaa Cardama e non o Estado uruguaio (baixo a anterior administración) (...), parece raro que o que ten que certificar que está a facer as cousas ben sexa contratado por si mesmo", exemplificou.

Segundo o secretario, a isto súmase o desencadenante da decisión de Orsi de rescindir o contrato: "A constitución dunha garantía falsa, pois a empresa garante, Eurocommerce, que estaba en proceso de liquidación no Reino Unido, agora está oficialmente pechada e un dos documentos que presentou motivou a recente denuncia dun notario español pola falsificación da súa firma".

Nese sentido, en conferencia de prensa, Sánchez valorou que hoxe "rompe os ollos" que houbo un proceso de fraude, de estafa ou de mala fe ao Estado uruguaio e argumentou que, por iso, ademais de ter certeza de que quen constrúa as patrulleiras as poida construír e o faga ben, o país necesita que se determinen os responsables.

"Necesitamos esclarecer quen estiveron involucrados na fraude do Estado, que hoxe xa ninguén o discute, porque Eurocommerce acaba de pechar (...) e agora hai que ver quen son, se tamén estivo involucrada Cardama ou non. Iso terao que definir a xustiza", lanzou.

O Ministerio de Defensa do Uruguai rubricou o 15 de decembro de 2023 o contrato de compra de dous buques de patrulla oceánica ao estaleiro español Cardama por 92 millóns de dólares.

O pasado 22 de outubro, o Goberno de Yamandú Orsi anunciou que rescindirá o contrato tras detectar irregularidades nas garantías do acordo logo de comprobar que a empresa Eurocommerce se atopaba en proceso de liquidación.

Na súa recente visita ao Uruguai, a portavoz nacional do Bloque Nacionalista Galego Ana Pontón dixo que lle transmitira a Orsi que Galicia ten un sector naval con moitísima capacidade e espera que o conflito se resolva de maneira satisfactoria para as partes.