O Supremo rexeita a petición de Koldo García de prohibir á prensa a difusión dos seus audios
A defensa do exasesor de José Luis Ábalos criticara que se difundiron gravacións sen relación coa causa
O instrutor do caso Koldo no Tribunal Supremo, Leopoldo Puente, rexeitou a petición do exasesor ministerial de que ordenase un secuestro xudicial dos audios que había nos teléfonos e a gravadora que se lle incautaron.
A defensa do exasesor pedira ao maxistrado do caso o "secuestro xudicial cautelar e inmediato" dos audios dos seus terminais telefónicos que non teñan relación directa co procedemento, ao considerar que a difusión de notas de voz relacionadas coa súa "esfera máis íntima constitúe unha gravísima intromisión no seu dereito fundamental á intimidade persoal".
Nun escrito, a defensa de Koldo García refírese ás mensaxes de voz contidos nos tres teléfonos e unha gravadora que lle foron incautados no rexistro do seu domicilio.
Eses dispositivos foron baleirados a pasada semana, desvelando máis de 22.000 mensaxes de toda índole. Trátase concretamente das gravacións descritas no auto polo que o maxistrado enviou a prisión provisional o exsecretario de Organización do PSOE Santos Cerdán o pasado 30 de xuño e recollidas no informe da Unidade Central Operativa (UCO) da Garda Civil.
