O Goberno, sobre os orzamentos do 2026: "Piano piano"

O presidente falou claro no seu balance de media lexislatura. Confirmou que o Goberno presentará os Orzamentos do 2026. Marcou o rumbo, pero evitou detalles. Preguntáronllos este martes ao ministro de Economía. A pregunta: Cando? E Carlos Cuerpo confirmou que xa se están a dar os primeiros pasos con Facenda co obxectivo de ter unha proposta pechada a finais de verán ou para inicio de outono.

Presentalos sería un paso adiante, o primeiro, pero para que sexan realidade, hai moito que andar. As curvas chegarían no Congreso, pero desde Moncloa piden ir pantalla a pantalla. A realidade é que hai moitos grupos que non están por botarlle unha man ao executivo. "Piano piano", recomenda a voceira do executivo Pilar Alegría.  

Se non saísen, en Moncloa non farán dramas. Defenden que as prórrogas dos últimos anos tampouco foron unha rémora.  Aínda que o ministro de Economía defendeu a importancia de contar cun orzamento actualizado, insistiu en que as prórrogas non foron inconveniente, xa que as partidas excedentarias dos PXE 2023 se reaxustaron para destinalas en función das necesidades, como no caso da vivenda.

“Eses orzamentos de 2023 eran especialmente expansivos, déronnos marxe para a axenda social”, precisou o ministro, que tamén apuntou que se conseguiu reducir a débeda e o déficit respecto ao PIB.

O propósito de Sánchez sentou ben no socio da coalición. A vicepresidenta Yolanda Díaz di que o goberno ten a obriga de presentar esas contas. 

No Partido Popular cren que será outra promesa incumprida. "O mesmo dixo o ano pasado", lembra a voceira do PP no Congreso Ester Muñoz.  Para os de Feijóo, o Goberno nin ten credibilidade nin interese en solucionar os problemas do país. Esta non é unha lexislatura normal, avisa Muñoz, que recoñece que hai que estar preparados para calquera cousa.