O Supremo anula a indemnización a Laureano Oubiña pola escena de sexo na serie 'Fariña'

O Tribunal Supremo anulou a indemnización de 15.000 euros que a Audiencia de Pontevedra impuxera a Atresmedia, Netflix e Bambú Producciones a favor de Laureano Oubiña pola inclusión dunha escena de sexo na serie 'Fariña'. A nova resolución establece que non existiu vulneración do dereito ao honor nin intromisión ilexítima na intimidade do demandante.

Oubiña reclamara inicialmente 1,5 millóns de euros ao considerar que a produción atentaba contra o seu honor, a súa imaxe e a súa intimidade. Argumentaba que a serie ofrecía unha caracterización falseada e ofensiva do seu personaxe e incorporaba feitos que, ao seu xuízo, non eran certos.

A Audiencia só estimara unha parte da demanda

O Xulgado de Vilagarcía desestimara a demanda na súa totalidade. A Audiencia de Pontevedra só lle dera a razón en relación coa primeira das escenas de sexo, pola que condenou as produtoras e plataformas a indemnizalo con 15.000 euros por danos morais.

O Supremo revoga agora esa decisión e estima os recursos das compañías. O tribunal lembra que Oubiña é unha figura pública condenada por narcotráfico e que a súa relación coa cocaína na serie non constitúe unha intromisión ilexítima no honor ao non esixir veracidade nunha obra de ficción e ao non supor un menoscabo relevante da súa reputación.

A escena sexual é unha recreación sen exposición real da intimidade

A sentenza conclúe que a escena de sexo non amosa feitos auténticos da vida íntima do demandante, senón unha recreación dramática. Considera que esa representación non ten a entidade suficiente para limitar a liberdade de creación artística das produtoras.

O ditame determina que a eventual afectación á intimidade non acada a gravidade necesaria para prevalecer sobre ese dereito e, por tanto, anula a condena imposta pola Audiencia de Pontevedra.