A pasaxe dos trens sinistrados ten dereito a indemnización por dúas vías
O seguro obrigatorio e o de responsabilidade civil cobren as persoas feridas e as familias das vítimas
A póliza do suxeito determinado como culpable do sinistro será a que pague as compensacións máis altas
O lugar da colisión este venres. REUTERS/Violeta Santos Moura
As persoas que ían nos trens accidentados están cubertas polo seguro obrigatorio. Ademáis, poderán recibir indemnizacións máis altas do seguro de responsabilidade civil cando se determine a culpabilidade.
No accidente ocorrido o pasado mércores na liña de alta velocidade Madrid-Andalucía produciuse un choque entre un tren AVE de Renfe e un convoi de Iryo no punto quilométrico 118, na zona de Urda e Organ, en Toledo.
Renfe Viaxeiros ten contratado o Seguro Obrigatorio de Viaxeiros con Everest Insurance (Ireland) DAC, sucursal en España, que tramita as reclamacións por accidentes acaecidos desde o 1 de xaneiro de 2025.
É un seguro para indemnizar a pasaxe ou os seus dereitohabentes cando sufran danos corporais nun accidente que teña lugar nos desprazamentos en tren ou nas estacións que xestiona.
Iryo, pola súa banda, ten suscrito un contrato coa aseguradora AIG Europe, sucursal en España, destinado a asegurar a indemnización da pasaxe ou dos seus dereitohabentes só durante o transporte ferroviario.
As contías das indemnizacións establécense en función dun baremo, que ten en conta, alén do falecemento e os danos sufridos, outras circunstancias, como ser cabeza de familia, por exemplo.
Nas páxinas web das compañías hai formularios para que as persoas afectadas comuniquen o sinistro e proporcionen información para abrir o expediente.
Familias de persoas desaparecidas en Toledo. REUTERS/Violeta Santos Moura
Responsabilidade civil
En canto á responsabilidade civil, Renfe conta cun seguro subscribido con QBE Europe SA/NV, sucursal en España, para responder dos danos causados á pasaxe, ás equipaxes, á carga transportada, ás infraestruturas, aos trens e a terceiros, cunha franquía dun millón e medio de euros.
Así mesmo, Adif dispón dunha póliza xeral de explotación e outra complementaria coa mesma compañía para cubrir a actividade da infraestrutura ferroviaria.
Todo medio de transporte púbico está obrigado pola lei a contratar un seguro obrigatorio da pasaxe, que protexe ante os danos corporais que poidan sufrir nos desprazamentos.
Everest Group é un provedor de seguros e reaseguros con sede en Delaware (os EUA), que opera a través de filial en diferentes territorios, e QBE Insurance é unha aseguradora australiana con cobertura en máis de 180 países que no 2007 abriu sucursal en España.
Pola súa banda, AIG é un grupo asegurador estadounidense que está presente en España desde 1974.
