O Samaín transforma Boeiros nunha aldea maldita
Toda a veciñanza desta localidade do Pereiro de Aguiar involúcrase na representación
Decoran rúas e vivendas para aterrorizar os visitantes
"Benvidos a Boeiros, a miña aldea. Eu son Leonides, a meiga do lugar".
As meigas fan de guías nesta pasaxe do terror que transforma a pacífica aldea de Boeiros nunha aldea maldita. Os veciños son os artífices desta arrepiante posta en escena que transforma as rúas, as airas e ata as propias vivendas e os seus habitantes.
"Estou facendo un caldo, pero a meigas leváronnos todo e agora temos que facer o caldo sen unto nin nada", explica unha das participantes.
Aquí non hai especialistas. Desde o guión ata a escenografía son obra das veciñas que se ocupan, tamén, da maquillaxe e caracterización dos personaxes.
"Miramos titoriais de youtube e copiamos o que vemos. Con tempo e paciencia, nada máis", cóntanos unha meiga.
Ata os cativos se volven malditos nesta aldea enfeitizada.
"Empeza a soar a música e poñémonos malditos, facendo cousas moi raras", comentan varios nenos.
A trama xira ao redor dun libro, que os participantes deben atopar.
"Teñen que resolver un enigma coas pistas que lles imos dando", explica Elena, unha das organizadoras.
E así, ata chegar ao final intentando non perder a calma, por difícil que resulte.
