O Samaín non foi propicio para o Coruxo no día dos goles pantasma
Tiña o partido controlado co gol de Youssef, pero adormeceu e viu como o filial do Burgos remontaba con dous goles en tres minutos (1-2)
O Coruxo tiña unha ocasión de ouro para poñerse na terceira posición da 2RFEF pero desperdiciuse ao perder diante do pechacancelas Burgos Promesas (1-2).
O que vira o primeiro tempo non podería crer o resultado final. Marcou Youssef Al Watani un gol con moito suspense e o equipo dos irmáns Montes tivo un feixe de oportunidades. Mereceu marcar algún tanto máis e ir ao descanso cun marcador máis amplo.
Na segunda parte o Coruxo xogou co resultado agardando algún contragolpe. O Burgos foi empurrando e sorprendeu co gol do empate á saída dun córner (tamén gol pantasma) e co segundo tres minutos máis tarde. Os goles de Tito e Erik deixaron tocado a un equipo vigués que tivo un remate de cabeza ao traveseiro para acadar o empate xusto no minuto 90.
