O Reino Unido prohibirá o uso das redes sociais aos menores de 16 anos

O primeiro ministro británico, o laborista Keir Starmer, anunciou este luns que o Reino Unido prohibirá o uso das redes sociais aos menores de 16 anos e tomará medidas sobre a comunicación en chats de xogos con descoñecidos.

A medida do Goberno, cuxo obxectivo é protexer os nenos dos perigos en liña, segue a tomada en 2025 por Australia, país que foi o primeiro do mundo en introducir unha prohibición deste tipo.

Espérase que as redes que resultarán afectadas son en principio as mesmas dez que en Australia: TikTok, YouTube, Instagram, Reddit, Facebook, X, Threads, Snapchat, Twitch e Kick.

Starmer dixo que a prohibición supón "un momento importante" para o Reino Unido e asegurou que se trata da "decisión correcta" e que "a maioría dos pais recibirana de bo grado".

"Véxoo como pai. Coñezo perfectamente os medos que todos sentimos ao pensar neste tema. O único que sempre quixen para os meus fillos, coa man no corazón, é que sexan felices e estean seguros, e creo que iso é o que calquera pai desexa, pero agora pregúntome: De verdade cremos que as redes sociais crean un ambiente feliz para os nosos fillos?", sinalou Starmer.

"De verdade cremos que é un lugar onde poden sentirse seguros? Creo que nin sequera necesito responder a esas preguntas, verdade? Todos os pais poden velo cos seus propios ollos. As redes sociais están a facer infelices os nenos", engadiu.

O primeiro ministro admitiu que a medida non será doada, xa que algunhas empresas tecnolóxicas queren facer crer que as redes sociais son "inmutables, parte dunha orde case natural". Pero o Reino Unido debe resistir ese argumento porque ten "a capacidade de decisión", puntualizou.

A medida, que deberá ser aprobada polo Parlamento, onde os laboristas teñen maioría absoluta na Cámara dos Comúns, decidiuse poucos meses despois de que concluíse unha consulta pública sobre a prohibición, que recibiu máis de 100.000 respostas, entre elas de pais e mozos.

Segundo esa consulta, o 90 % dos pais e nais que responderon apoiaron unha idade mínima de 16 anos para acceder ás redes sociais por considerar que os riscos das redes sociais superan os beneficios.