O reencontro de Borja Iglesias 

O dianteiro Borja Iglesias reencóntrase este mércores co Betis no primeiro exame da tempada para o Celta, obrigado a sumar a primeira vitoria do curso antes de recibir ao Vilarreal e afrontar dúas saídas consecutivas aos estadios de Raio e Elxe.

En Balaídos, escenario onde brillou o curso pasado e ante o seu exequipo, Borja Iglesias recuperará a titularidade despois de arrincar no banco ante Xetafe e Mallorca. A esixencia é máxima para o equipo de Claudio Giráldez, que volverá axitar o seu once despois de que o seu equipo só sumase un punto nos dous primeiros partidos.

Con dous partidos en cinco días, o técnico celeste realizará unha rotación maior do habitual. Nas dúas primeiras xornadas, 17 futbolistas xa formaron parte do once inicial. Deles, unicamente cinco repetiron nos dous partidos como titulares: Radu, Marcos Alonso, Aspas, Moriba e Jutglà. Os tres primeiros parecen os únicos que apuntan a sumar unha nova titularidade ante o Betis, nun duelo no que, ademais de Borja Iglesias, o extremo Bryan Zaragoza tamén podería estrearse no once.