O prezo do peixe e marisco mantense alto no Barbanza
Contan con que comece a baixar en quince días
O polbo mantén o prezo pola pouca oferta e peixes como a sardiña baixou, quedando hoxe na lonxa a pouco máis dun euro
A fin da tempada fixo caer o prezo dalgúns peixes e mariscos da Costa da Morte. Non sucede así no Barbanza, onde se manteñen. Con todo prevén que comezará a baixar en 15 días, cando diminúa tamén o turismo na zona.
O mercado municipal de Boiro segue tendo moito movemento de xente, pero non se fai notar tanto nas vendas.
"Un polbo e un quilo de pescado son 60 euros e non todos poden gastar iso, porque a vida está moi cara", comenta Jesús Ángel Muñiz, que conta cun posto no mercado.
Unhas vendas, que despois dun xullo regular, repuntaron algo en agosto. "O marisco no verán incrementa bastante o seu prezo. Hai que moverse moito, nós temos que facelo e ás veces atopamos o produto de calidade a un prezo razoable", di Juana Silva, que tamén conta cun posto no mercado de Boiro. "Quizais onde máis se notou a subida foi na ameixa, o berberecho, a navalla ou o percebe, que nós xa non podemos chegar a el", engade.
Con todo, agardan a que comecen a baixar nalgúns peixes e mariscos, pois o turismo nesta zona aínda se prolonga case 15 días máis con respecto á Costa da Morte, e iso faise notar tamén nos prezos. Explica neste senso Jesús Ángel Muñiz: "Que comece a baixar un pouco o peixe, contamos pero non é fixo pois depende como veñan os temporais, o tempo para Galicia ".
Tan só o polbo mantén o seu prezo, uns 15 euros o quilo, pois a oferta é baixa, e algúns peixes como a sardiña baixaron e están a pouco máis do euro na lonxa.
