O prezo de vivenda nova en Galicia alcanza o seu máximo histórico no decembro pasado

O prezo medio da vivenda nova situouse en 1.882 €/m2 en Galicia ao peche de 2024, tras rexistrar un aumento interanual do 3,6 %, que en termos semestrais foi do 2,3 %, polo que a comunidade alcanzou en decembro do ano pasado o seu máximo histórico.

Segundo datos do Estudo de Vivenda Nova en Galicia, Asturias, Cantabria, País vasco e Navarra, publicado por Sociedad de Tasación, por concellos, Santiago de Compostela (1.880 €/m2) encabeza o aumento do prezo da vivenda nova durante o último ano en termos porcentuais, cun 5,4 % de incremento; por diante da Coruña (2.156 €/m2), cun 4,3 %; e O Barco de Valdeorras, 1.028 €/m2, cun incremento do 4 %.

A Coruña é o municipio co prezo máis elevado (2.156 €/m2) e é o único que supera a barreira dos 2.000 €/m2. Por detrás sitúanse Santiago de Compostela (1.880 €/m2) e Vigo (1.795 €/m2).

Hai sete concellos que alcanzaron en decembro de 2024 o seu máximo histórico. Son A Coruña (2.156 €/m2), Santiago de Compostela (1.880 €/m2), Ourense (1.756 €/m2), Lugo (1.650 €/m2), Pontevedra (1.509 €/m2), Ferrol (1.403 €/m2), e Ames (1.250 €/m2).

O estudo tamén inclúe información sobre o índice de esforzo inmobiliario, cuxo indicador mide o número de anos de soldo íntegro que un cidadán medio necesitaría destinar para a compra dunha vivenda de tipo medio, que no caso de Galicia se situou en 7,2 anos ao peche do cuarto trimestre de 2024.

Este dato diminuíu dúas décimas respecto ás cifras do ano anterior (7,4 anos), e sitúase ademais por baixo da media nacional (7,5 anos), segundo a mesma fonte.

Á súa vez, o índice de accesibilidade de Sociedad de Tasación, indicador que se encarga de medir a capacidade de acceso á vivenda por parte dun cidadán cuns ingresos medios valorando o seu salario e capacidade de endebedamento, sitúase en Galicia en 87 puntos, catro puntos máis respecto ao trimestre anterior e dez respecto á cifra de hai un ano (77).