O PP solicitará o expediente do concurso en que interveu a muller de Pedro Sánchez

O PP solicitará ao Ministerio de Economía o expediente do concurso público que contou cunha recomendación asinada pola muller do presidente do Goberno, Begoña Gómez.

O vicesecretario de Cultura e portavoz do PP Borja Sémper afirmou que van esixir transparencia e puntualizou que quen ten que dar resposta non é a muller do presidente senón o propio Pedro Sánchez motu proprio.

Durante a súa participación nun acto do Partido Popular en Alacante, o portavoz popular tamén explicou: "Se non entendeu como hai que reaccionar ante sospeitas de corrupción ou ante sospeitas de aproveitar a súa posición política para beneficiar á súa contorna, será ante unha comisión de investigación no Congreso e no Senado ou ante o xuíz".

Segundo relatou o diario El Confidencial, Gómez asinou unha carta de recomendación en 2020 a dúas empresas na adxudicación dun contrato de 7,7 millóns de euros que emitiu o propio Goberno de Pedro Sánchez.

Segundo esta información, as empresas Barrabés e The Valley, que forman a UTE Barrabés-The Valley, puideron ser beneficiadas neste concurso público. Un dos accionistas, Carlos Barrabés, deseñou o Máster en Trasformación Social Competitiva que dirixe a muller de Sánchez.

Fontes do PP indicaron: "É moi grave que o Goberno conceda unha adxudicación millonaria á empresa que contratou á muller de Sánchez, sendo este quen o autoriza como presidente do Executivo. As explicacións xa non é que sexan urxentes: son imprescindibles".

"Estamos a asistir a un goteo incesante de informacións que apuntan ao labor de mediación da muller de Pedro Sánchez con empresas que recibiron fondos millonarios do Goberno e que dispararon a súa facturación despois do seu labor de intermediación", engadiron.