O PP de Ramirás rompe o pacto de goberno co PSOE

O Partido Popular de Ramirás, informou este mércores da ruptura do pacto de goberno alcanzado co PSOE da localidade ante as "reiteradas escusas" da alcaldesa, a socialista Isabel Gil, para non ceder o cargo

Nun comunicado, o PP de Ramirás anuncia a ruptura do pacto de goberno alcanzado co PSOE tras as municipais de 2023 polo que ambas as formacións acordaron senllos períodos de dous anos á fronte da Alcaldía. O PP asegura que, segundo este acordo, o portavoz popular Juan Carlos Rodríguez Matías tiña que presidir a corporación municipal desde o pasado mes de xuño.

"Xa transcorreron máis de cinco meses" e "non ven predisposición por parte da alcaldesa". "Só continuas escusas para evitar a substitución", censuran.

En consecuencia, dixo Rodríguez Matías, o PP de Ramirás pasará a ser oposición polo que votarán "a favor, en contra ou abstención" en función do que consideren "mellor para os veciños e para o concello".

O concelleiro do PP lembrou que nas eleccións locais de maio de 2023 rexistrouse un triplo empate entre PP, PSOE e BNG, obtendo cada formación tres concelleiros. "Sempre estivemos abertos a falar con socialistas e nacionalistas, aínda que as negociacións non foron fáciles", sinala Juan Carlos Rodríguez. Tras descartar a opción co BNG, o PP sostén que o pacto alcanzado co PSOE tiña como principal acordo a substitución na alcaldía aos dous anos de mandato, ademais de incluír a dous concelleiros do PP na Comisión de Goberno.

O portavoz do PP sinala que Isabel Gil empezou a primeira quenda, "xa que o estar a gobernar nos catro anos anteriores podería así terminar algúns proxectos que tiña en marcha, como o centro de día". Con todo, sostivo que, o 30 de xuño empezaron os contactos para iniciar a substitución, "tal e como estaba fixado", pero que "desde entón só escoitan máis escusas sobre a apertura do centro para maiores".

Así as cousas, o PP indica que, en setembro, o grupo municipal do PP esixiu que se convocase o pleno para dar conta do cesamento de Isabel Gil á fronte da alcaldía. "Dábannos igual 15 días arriba ou abaixo, pero o escrito da convocatoria non chegou", asegura. Esta situación, "unida á ausencia de reunións da Comisión de Goberno", levou finalmente aos populares de Ramirás a "romper o pacto de goberno cos socialistas e iniciar unha nova etapa na oposición".

Apoio da dirección provincial do partido

A dirección provincial do PP expresou o seu "firme apoio" ao grupo municipal popular de Ramirás, que "ata o último momento e moito máis alá do previsto tentou que se cumprise o pactado, como eles fixeron respectando sempre o acordo de goberno".

A dirección provincial destaca que "ante a complexa situación derivada dos resultados das eleccións municipais en 2023, os concelleiros do PP tiñan moi claro o seu obxectivo": "Conseguir o acordo máis vantaxoso para o Concello e os seus habitantes, garantindo a gobernabilidade".

 Pola súa banda, a alcaldesa, Isabel Gil, limitouse a trasladar que respecta a decisión tomada polos populares.