O Parlamento constitúe a Deputación Permanente, en que están todos os conselleiros

A Deputación Permanente, o órgano que se encarga das funcións do pleno cando o Parlamento está disolto ou fóra do período de sesións, quedou constituída este luns, con 25 membros: 13 do PP, entre eles todos os conselleiros e conselleiras en funcións, e 12 da oposición.

O primeiro trámite foi a elección da mesa -presidida, como marca o Regulamento, polo presidente da Cámara, Miguel Santalices- que terá como vicepresidenta a tamén deputada popular Elena Candia.

A secretaria deste órgano será a nacionalista Montse Prado, co que a dirección da Deputación Permanente queda configurada de maneira similar ao propio pleno.

Non se produciu ningunha sorpresa nas votacións en urna para elixir estas dúas integrantes da mesa, coa oposición votando en branco á proposta do PPdeG e o grupo maioritario facendo o mesmo na exposta polo BNG, mentres que o único deputado de Democracia Ourensá, Armando Ojea, votou en branco en ambas as ocasións.

O presidente da Xunta en funcións e do PPdeG, Alfonso Rueda, liderou o grupo popular, no que tamén se integran todos os conselleiros e conselleiras en funcións: Diego Calvo; Ángeles Vázquez; Miguel Corgos; Elena Rivo; Fabiola García; Román Rodríguez; María Jesús Lorenzana, José González; Julio García Comesaña e Alfonso Villares; así como Ethel Vázquez, secretaria da Mesa do Parlamento.

O BNG estivo encabezado pola súa líder, Ana Pontón, acompañada de Prado, Olalla Rodil, Luis Bará, Noa Presas, Rosana Pérez, Mercedes Queixas, Iago Tabarés.

Por parte do PSdeG, o portavoz, José Ramón Gómez Besteiro, estivo ausente (por unha cita médica) desta primeira reunión da Deputación Permanente e foi substituído por Lara Méndez, que acudiu xunto con Elena Espinosa, ambas as viceportavoces do grupo parlamentario, e Patricia Iglesias, vicesecretaria da Mesa.

A Deputación Permanente complétase co único integrante o Grupo Mixto, Armando Ojea.

A creación da Deputación foi a primeira cita da axenda parlamentaria deste luns, que seguirá ata pasadas as dúas da tarde coa constitución sucesiva de todas as comisións parlamentarias.

Esta semana o Parlamento continuará completando as fases deste inicio da XII lexislatura, coas consultas de Santalices cos portavoces dos grupos, mañá mesmo, antes de propoñer un candidato para a Presidencia da Xunta, que será Alfonso Rueda, dado que o seu partido ten a maioría absoluta.

O debate de investidura celebrarase a semana que vén, os días 9 e 11 de abril, e a toma de posesión de Rueda será o sábado 13.

O BNG volve presidir a comisión de Economía, o PPdeG dirixe todas as outras

Os usos parlamentarios volveron cumprirse e unha vez máis e o BNG, principal grupo da oposición, presidirá a comisión de Economía da Cámara, mentres que o grupo maioritario, o PPdeG, dirixirá todas as outras.

Foi unha mañá "intensa" no Parlamento de Galicia, segundo sinalou o seu presidente, Miguel Santalices, na que ademais de constituírse a Deputación Permanente e tamén o fixeron as trece comisións parlamentarias que teñen este mesmo carácter permanente, xa que reinician a súa actividade cada lexislatura.

A comisión Institucional será presidida por Marisol Díaz Mouteira; a de Ordenación Territorial, por Carmen Pomar; a de Educación e Cultura, por Rubén Lorenzo; a de Sanidade, por Noelia Pérez López; a de Industria, por Cristina Sanz; a de Agricultura, por Elena Candia; e a de Pesca, por José Manuel Balseiro.

O PPdeG tamén presidirá a comisión para as relacións co Consello de Contas, con Borja Verea, e a de control da CRTVG, con Raquel Arias.

A única excepción é a comisión de Economía, que nesta XII Lexislatura volverá estar presidida pola deputada nacionalista galegas Noa Presas. O vicepresidente será Gonzalo Trenor e o a secretaria Martina Aneiros, ambos os do PPdeG.

As outras tres que restan, a comisión do Regulamento, a de Peticións e a o Estatuto dos Deputados, nin sequera teñen que elixir os seus dirixentes, xa que se repite o mesmo esquema do os órganos directivos da Cámara galega.

Foi unha sucesión de votacións en urna, para elixir sucesivamente as persoas que ocupan a presidencia, a vicepresidencia e a secretaría de cada comisión, que deparou poucas sorpresas e menos anécdotas, máis aló dalgún descoido ao depositar o voto ou co horario de inicio de cada unha.

Iso si, os membros da mesa do Parlamento e os deputados e deputadas que repetían en varias comisións tiveron que percorrer o corredor unha e outra vez entre as dúas salas nas que se repartiron as reunións, que se iniciaron a 10:00 horas e concluíron ás 14:30 horas.