O papa e o presidente de Israel abordan no Vaticano a situación en Gaza

O papa León XIV recibiu no Vaticano o presidente de Israel, Isaac Herzog, nunha audiencia en que abordaron a situación en Gaza e a posibilidade dun cesamento do fogo permanente.

O pontífice expresou a súa esperanza en que se retomen axiña as negociacións para liberar os reféns e asegurar a entrada da axuda humanitaria, así como para garantir o respecto do dereito internacional e as aspiracións lexítimas de palestinos e israelís.

Herzog agradeceu a acollida e subliñou nas redes sociais que os líderes relixiosos deben alzar a voz pola liberación dos reféns, aínda que evitou referencias directas á guerra en Gaza.

Ademais do encontro co papa, reuniuse co secretario de Estado, Pietro Parolin, e co secretario para as Relacións con Estados e Organizacións Internacionais, Paul R. Gallagher.

Aposta pola solución de dous estados

Segundo informou a Santa Sé, durante as reunións tamén se tratou como garantir un futuro ao pobo palestino, a paz e a estabilidade rexional, así como a situación en Cisxordania e a importancia de Xerusalén.

O Vaticano reiterou que a solución de dous estados é a única saída á guerra en curso.

Herzog fixo referencia á liberdade de culto e destacou o compromiso de Israel coa seguridade das comunidades cristiás en Terra Santa e en todo Oriente Medio.

Pola súa parte, a Santa Sé confirmou que tamén se trataron cuestións sobre as relacións entre as autoridades israelís e a Igrexa local.

Este encontro chega nun intento de recompoñer as relacións entre o Vaticano e Israel, danadas polo bombardeo en xullo da única parroquia católica en Gaza, onde se refuxiaban máis de 400 persoas.

O ataque, que deixou tres mortos e varios feridos, foi cualificado polo primeiro ministro Benxamín Netanyahu como un “incidente tráxico” e provocou unha condena internacional.

Durante o pontificado de Francisco tamén houbo momentos de tensión, especialmente polas súas declaracións sobre Gaza e o chamado a investigar se algúns feitos poderían constituír un xenocidio.

O presidente israelí xa avanzara en maio a súa intención de convidar o papa a visitar Terra Santa para abrir unha nova etapa nas relacións, pero a invitación aínda non se formalizou.

A semana pasada, León XIV pediu que se respecte plenamente o dereito humanitario en Gaza, advertindo contra o uso indiscriminado da forza e o desprazamento forzado de poboacións.