O Obradoiro derrota o Bilbao no Sar (77-64) e suma a décima vitoria

O Obradoiro sumou a décima vitoria da temporada no Sar. Foi diante dun rival ao que deixa a dúas vitorias na táboa. 

Os santiagueses mandaron no marcador en todo momento, impoñéndose nos tres primeiros parciais e cedendo só o último, xa co partido decidido.

Blazevic foi o máximo anotador dos de Moncho Fernández con 19 puntos, achegando 23 de valoración. Escoltárono Robertson con 15 e Vicedo con 14.

Os bilbaínos acusaron a ausencia de Hakanson. Non abondaron os 14 puntos de Smith nin os 15 de valoración de Sulejmanovic. 

Coa vitoria final, o Obradoiro presenta a súa candidatura a soñar con algo máis importante ca a permanencia, que xa ten na man.