O Obradoiro consegue a segunda vitoria da temporada ante o Xirona de Marc Gasol
O Obradoiro consegue a segunda vitoria da temporada ante o Xirona de Marc Gasol
Os de Moncho Fernández foron moi superiores ao seu rival e levaron vantaxe durante todo o partido
O marcador final, 89-63, reflectiu esa superioridade, que recoñeceron os dous técnicos
O Obradoiro logrou o segundo triunfo da temporada, unha clara vitoria sobre un Xirona que chegaba coa súa grande estrela, o presidente-xogador Marc Gasol, e o clásico Aíto García Reneses no banco.
Pero o equipo santiagués non se deixou cegar polo glamour do rival e marcou territorio xa desde o inicio, cun parcial de 29-13 ao remate do primeiro cuarto que deixaba ás claras a diferenza de rendemento no partido.
No segundo cuarto houbo unha tímida reacción dos cataláns, pero o Obradoiro conseguiu manter a diferenza ao descanso.
Na segunda parte o equipo galego volveu gañar os dous parciais e estableceu a diferenza final nese claro 89 a 63. Bender comandou a notación con 18 puntos e 24 de valoración, axudado polos Scrubb e Blazevic, que tamén pasaron dos dez puntos. Marc Gasol achegou 13 puntos, que non lle serviron ao seu equipo.
Moncho Fernández e Aíto García Reneses coincidiron na lectura do partido. Os dous viron un Obradoiro moi superior no partido do Sar, o que se plasmou no resultado.
