Un único controlador aéreo facía o traballo de dous o día do accidente de Washington
Un informe preliminar da Administración Federal de Aviación (FAA) sinala que o número de controladores no momento do sinistro "non era normal"
Os servizos de rescate recuperaron os corpos de 40 das 67 vítimas e tamén as caixas negras
Os traballos de rescate reanudáronse tan pronto foi día en Washington. Máis de 300 efectivos buscan os corpos dos pasaxeiros que faltan, e sacan do río Potomac restos da fuselaxe das dúas areronaves pra deducir os ángulos de impacto e determinar a traxectoria e a altitude que levaban.
Os investigadores analizan tamén as caixas negras do avión. No informe preliminar, a Axencia de Seguridade no Transporte dos Estados Unidos constatou fallos na torre de control. Había unha única persoa facendo o traballo que deberían facer dúas, e controlaba ao mesmo tempo a ruta do avión e a do helicóptero.
Desde a Casa Branca insisten en que iso causou o acidente.
"O helicóptero voaba demasiado alto e esa foi unha das causas do accidente. Outras posibles causas estanse investigando", asegura Karoline Leavitt, portavoz da Casa Branca,
Nas últimas horas trascendeu que un día antes do accidente un avión de pasaxeiros tivo que abortar a aterraxe pra non chocar cun helicóptero militar. Circunstancia pola que as autoridades decidiron pechar indefinidamente o corredor de helicóptero que transcorre preto do aeroporto Ronald Reagan.
Un informe preliminar da Administración Federal de Aviación (FAA) apunta que a dotación de persoal dedicado ao control aéreo "non era normal para a hora do día e o volume de tráfico" no momento do accidente ocorrido en Washington o mércores á noite.
Medios estadounidenses que tiveron acceso a ese informe din que o escaso número de traballadores fixo que unha persoa tivera que facerse cargo de dúas tarefas á vez: o control aéreo tanto do tráfico de avións coma dos helicópteros que voan sobre a capital dos Estados Unidos.
Esa situación puxo de manifesto a escaseza crónica de persoal e as pobres condicións de traballo dos controladores aéreos nos EUA, unha situación que varios expertos e os propios traballadores denunciaron desde hai anos.
Un estudo de agosto de 2023 do The New York Times xa alertaba de que moitos controladores se vían forzados a facer xornadas de 10 horas durante seis días á semana. A investigación fixo mellorar a situación pero non sería aínda suficiente: das 30 prazas necesarias para o Aeroporto Nacional Ronald Reagan de Washington (DCA), apenas 25 están cubertas.
Segundo The Washingon Post, as advertencias de seguridade e os escenarios de incidentes son frecuentes no ceo de Washington.
