O músculo do Gran Canaria pasa por riba do Obradoiro (58-85)
Clara vitoria dun equipo canario que conseguiu un resultado de escándalo no último cuarto
Galicia está a ser un lugar idílico para o Gran Canaria. Gañou cunha malleira na pista do Breogán e repetiu no Sar contra o Obradoiro (58-85).
O partido quedou definido no primeiro cuarto cun gran inicio dos visitantes (5-13) diante dun Obra que non puido contar con Westermann e que en ataque estivo moi fallón. Gran Canaria chegou a ter unha máxima de dez puntos (11-21) e as marxes pasaron a moverse por riba desa diferenza a partir do segundo cuarto. Malia que Bender se botou o equipo ás costas non conseguiu reducir as diferenzas que no descanso eran de oito puntos (29-37).
Cun Shurna moi acertado o Gran Canaria impediu calquera achegamento dos de Moncho Fernández no terceiro cuarto. Como moito puxéronse a seis pero Gran Canaria encadeaba un par de bos ataques seguidos que devolvía os dez de marxe. O terceiro cuarto rematou cun 45-58 e a sensación de que gañar ía ser imposible.
No último cuarto o Obradoiro baixou os brazos e iso aproveitouno Gran Canaria para facer moito dano cun Balcerowski que machacou na pintura. Ao final o resultado de 58-85 reflicte a superioridade canaria. Só Bender (21 puntos e 6 rebotes) ofreceu unha boa versión nos galegos.
