O Ministerio de Pesca adía a orde que ía a obrigar rexistrar a bordo pescados difíciles de clasificar

Finalmente a orde do Ministerio de Pesca de ter que separar e catalogar a bordo, e non en terra, determinadas especies de peixes non entrará en vigor este luns, como estaba previsto. Parte das organizacións pesqueiras galegas respiran, polo momento, á espera de coñecer o novo texto.

Polo momento os barcos de pesca, tanto os de fresco como os de conxelado van seguir traballando no marco daquela resolución de denominacións comerciais do ano 2019. Onte, venres, a última hora da tarde recibiron unha comunicación do Ministerio de Pesca onde lles indicaban que esa nova norma de clasificar e etiquetar a bordo especies da mesma familia de peixes non vai entrar en vigor o luns como estaba previsto. Segundo a nova normativa o rape, por exemplo, tería que chegar a terra con ese código de rape negro ou branco, e o mesmo coas meigas ou cos rubios. Agora, como nos contaban esta mañá desde OPROMAR, os produtores de pesca do Porto e da Ría de Marín, o sector queda á espera da publicación dun novo texto ministerial.

Citámonos no porto de Marín co representante de OPROMAR, unha das seis organizacións pesqueiras galegas, vascas e cántabras que se opoñían a nova norma do ministerio de pesca que ía entrar en vigor o vindeiro luns pero que xa non o fará segundo a comunicación do ministerio hai unhas horas. Así que a flota española, e por tanto a galega, poderá seguir rexistrando as capturas como ata agora, é dicir, anotando a familia xenérica do peixe sen máis especificacións.

"Hai especies que son moi difíciles de clasificar como o rape, que pode ser branco ou negro, as meigas, meigas de catro manchas ou do norte, e tamén son moi compricadas de clasificar as diferentes especies de rubios, que poden ser cabetes, escachos... e na nosa opinión a súa clasificación a bordo resultaría moi complicada de facer con certeza", conta Francisco Fernández, o voceiro de OPROMAR.

Ese grupo de seis asociacións pesqueiras en contra da norma de clasificar a bordo os rapantes, rubios e rape segundo a tipoloxía, e anotalos cun código especíico nos diarios electrónicos de pesca apoian a súa oposición na sobrecarga de traballo que suporía para as tripulacións e para a almacenaxe nas bodegas. 

"Porque considerabamos que se trata dunha medida moi pouco práctica e tomada de xeito precipitado. O resultado da súa aplicación sería un aumento da carga de traballo por parte da tripulación e ademáis causaría o efecto de que aumentaría significativamente os erros á hora de clasificar e rexistrar as capturas", engade Francisco Fernández, o voceiro de OPROMAR.

Parte do sector agarda a coñecer a nova orde do Ministerio de Agricultura, Pesca e Alimentación para presentar ou non alegacións ao texto.