O metal de Lugo deconvoca a folga tras lograr unha suba salarial do 18 % en catro anos
O acordo alcanzado suporá un incremento do 5 % en 2026, un 4,5 % en 2027 e 2028 e un 4 % en 2029
Os sindicatos valoran o pacto: "A folga e a negociación permitiron avanzar nas condicións laborais e salariais do sector"
Marcha dos traballadores do metal de Lugo durante unha das xornadas de folga neste mes de outubro (Europa Press)
As asembleas de traballadores dos convenios de siderometal e comercial do metal na provincia de Lugo, que se celebraron a pasada noite na capital lucense e en Viveiro, votaron a favor de aceptar o acordo alcanzado polos sindicatos coa patronal e desconvocar a folga no sector.
Segundo a información facilitada polos sindicatos convocadores o resultado foi de 83 votos a favor por 44 en contra nas citadas asembleas.
O acordo negociado coa patronal contempla un incremento salarial do 18 %, distribuído en catro anos, de modo que subirá un 5 % en 2026, un 4,5 % en 2027, a mesma porcentaxe en 2028 e un 4 % en 2029.
Así mesmo, acordouse unha cláusula de revisión do IPC con efectos retroactivos desde o 1 de xaneiro de cada ano e sen límite, ademais do pagamento dos atrasos correspondentes.
Tamén se negociou a redución en 8 horas da xornada anual, así como a ampliación de 20 a 24 horas anuais do tempo para a asistencia a consultas médicas de Atención Primaria, que tamén poderá ser utilizado para acompañar a familiares en primeiro grao.
O acordo tamén inclúe melloras en licenzas, dietas, horas extras, gardas e clasificación profesional, de modo que os sindicatos estiman que "a folga e a negociación permitiron avanzar nas condicións laborais e salariais do sector".
