O temporal deixa 250 incidencias, dúas feridas e máis de 300 lóstregos en Galicia

O temporal non dá tregua a Galicia, que rexistra vento de máis de 120 quilómetros por hora, neve en zonas de montaña, mantén baixo seguimento os leitos de varios ríos por risco de desbordamento e está cancelado o transporte de ría.

As treboadas das últimas horas, segundo datos de MeteoGalicia, deixaron en Galicia máis de 300 lóstregos.

​​​​​Así, segundo os valores recolleitos na páxina web de MeteoGalicia, o refacho de vento máis forte foi en Estaca de Bares, con 135 km/h; seguino  o de Lardeira- Carballeda de Valdeorras, con 127,8 km/h, e na Gándara, en Vimianzo, e alcanzou o 120,6 km/h. Outros dos valores extremos rexistráronse en Punta Candieira, en Cedeira, con refachos de 118,2 km/h, tamén en Burela (107,6 km/h), e en Xesteiras, en Cuntis (103,5 km/h).

En canto as chuvias, os acumulados chegaron a 47.1 litros por metro cadrado en Rois. Entrimo e Forcarei superaron os 43, Lousame chegou os 42,6 e Poio rexistrou 41,2 litros por metro cadrado.

A comunidade galega segue mantendo activo o Plan Especial ante o risco de inundacións (Inungal) en fase de preemerxencia e, actualmente, están en seguimento un total de seis ríos. Desta forma, pona especial atención no río Ouro, ao seu paso por Foz; Mero (Cambre); Barcés (Abegondo); o Tambre por Oroso e Trazo; e o Lérez (Pontevedra).

Máis de 250 incidencias

Vento, choiva, granizadas e tormentas deixaron máis de 250 incidencias --un total de 254-- rexistradas polo 112 desde as 00,00 horas ata as 18,00 horas deste venres.

A caída de árbores e ramas nas estradas (58) e as incidencias por prevención de risco (38) seguen sendo as tipoloxías máis repetidas no que respecta a as incidencias do temporal.

Por provincias, destacan as de Pontevedra (117) e a da Coruña (92) incidencias, seguidas de Lugo (27) e Ourense (18).

O concello de Vigo foi un dos máis afectados cun rexistro de (19) incidentes, mentres que en Santiago de Compostela rexistráronse sete, seis en Ribeira, nove en Pontevedra, sete en Ponteareas, catro nas Pontes e outros catro en Culleredo.

Na provincia de Lugo, nos concellos de Begonte, Lugo e Cervo rexistráronse tres incidentes en cada un, do mesmo xeito que en Ribadavia e San Cibrao --na provincia de Ourense--.

Caída de cristais en Vigo

Entre outras incidencias destacadas, ás 17,00 desta tarde un particular informou ao 112 de que caían cristais dunha fábrica abandonada encima dos coches, na Rúa de Falperra, en Vigo. Non houbo persoas afectadas. Informados a través o servizo de emerxencias, desprazáronse ao momento efectivos dos bombeiros, a Policía Local e da Agrupación de Voluntarios de Protección Civil de Vigo.

Tamén un particular informaba sobre as 17,00 horas de que por mor do vento caera a preto de formigón e ferro na estrada, na Rúa de Manuel Lago Lago. Indicaba que non había persoas afectadas pero que ocupaba toda a beirarrúa e parte dun carril da estrada. Foron mobilizados efectivos de bombeiros e a Policía Local.

En Ferrol, sobre as 16,30 horas tamén un particular comunicaba ao 112 Galicia que ía circulando pola Rúa do Sol e caíalle unha pedra ou uralita encima do coche. Ninguén resultou ferido.

En Pontevedra, un canlón desprendeuse e quedou sobre un banco da Rúa Amado Carballo. Así o indicaba o particular que chamou ao 112 Galicia para advertir de que existía risco de que saíse voando de novo. Non causou danos persoais.

Sobre as 17,30 horas, en Barro, un particular comunicaba ao 112 Galicia que un raio caera sobre un poste da luz. Aseguraba que non había feridos, tampouco ardía, pero dicía que os cables estaban tirados na estrada, en San Amaro.

Igualmente, ás 18,30 horas solicitouse ao 112 Galicia a saída dos bombeiros de Vilagarcía para a Rúa de Sucavirto, na Illa de Arousa. Un raio caera nunha vivenda e provocou a caída de cascotes. Tampouco houbo danos persoais.

Accidente no Túnel da Madroa

En Vigo, pasadas as 15,30 horas, houbo un choque entre un camión e un turismo no Túnel da Madroa. A colisión produciuse dirección Coruña, na AP-9, quilómetro 152, ao seu paso por Teis.

Dúas feridas pola caída dun teito na Coruña

Na Coruña a caída dun teito deixou dúas persoas feridas. Sucedeu sobre as 16,30 horas. A esa hora, un particular contactaba co 112 Galicia para informar de que o teito dun cuarto dun centro de estética situado na Rúa Francisco Mariño, na Coruña, caera sobre unha traballadora e unha clienta.

O alertante aseguraba que estaban totalmente accesibles pero que estaban feridas. Desde o 112 Galicia informouse a Urxencias Sanitarias de Galicia, aos axentes da Policía Nacional e Local e aos bombeiros.

Transporte de ría e estradas en Vigo

As navieiras que operan o transporte de ría víronse obrigadas a suspender as conexións cos portos de Moaña e Cangas, debido ás malas condicións meteorolóxicas.

Na liña Vigo-Moaña, aínda que inicialmente prevíase cancelar os barcos de primeira hora e ofrecer servizo desde as 9:00 horas, finalmente só operouse unha conexión, e quedaron suspendidos todas as viaxes desde as 9:30 horas.

Alerta vermella

Desde a tarde deste venres a Xunta ten activa a alerta vermella por temporal costeiro no litoral da Coruña e de Pontevedra e mantén a alerta laranxa na Mariña de Lugo.

Segundo a Axencia Estatal de Meteoroloxía (Aemet), o fenómeno meteorolóxico adverso de nivel vermello afectará á costa noroeste e oeste da Coruña desde primeiras horas da tarde, estendéndose a media tarde ao litoral suroeste coruñés e de Pontevedra.

Espérase mar combinado con ondas de ata nove metros e vento do oeste de ata forza nove.

Temporal que non remata en xaneiro

En canto ao fin de semana, o sábado haberá unha pequena tregua, con menos choivas, aínda que pola noite entrará unha nova fronte que aumentará as precipitacións para dar paso ao novo mes.

O inicio de febreiro non traerá unha melloría, xa que unha nova fronte asociada a unha borrasca situada ao oeste de Irlanda deixará o domingo choiva que comezará polo suroeste e con precipitacións na maior parte do territorio pola tarde e noite.