O Lugo asina unha permanencia gris despois de perder co Amorebieta (1-0)
O resto de resultados fóronlle favorables e salvaron ao equipo lugués
O Lugo culminou unha temporada gris cunha resolución á altura do campionato. Perdeu no campo do Amorebieta (1-0) xa descendido cando precisaba gañar. Pero o resto de rivais tampouco fixeron o seu traballo e favoreceron os intereses dun Lugo que precisa esquecer canto antes esta tempada.
Dominou desde o principio ata o final o partido contra o pechacancelas da categoría -que rematou o campionato con tres vitorias diante de equipos galegos- pero non atopou o xeito de perforar a porta contraria. O Amorebieta aproveitou unha das dúas ocasións que tivo en todo o encontro. Marcou no 19 Álvaro Marín.
De aí ata o final, un querer e non poder do cadro dirixido por Álex Ortiz, nervioso ata que o colexiado asubiou o final do partido e souberon polos seus compañeiros do banco que a permanencia era un feito.
