O Leyma mide as súas forzas no fortín do COB no Paco Paz
Visita ao COB tres días despois de dobregar ao Alacant no Coliseum cun grande esforzo físico
O cadro de Moncho López só perdeu dous dos seus dez choques como local
Sen tempo que perder e coas espadas afiadas. Así visita o Leyma Básquet Coruña o Pazo Paco Paz hoxe mércores, para enfrontarse a un Club Baloncesto Ourense que na súa casa é practicamente imbatible.
Un líder sólido fronte a un candidato ao play off que non termina de asentarse no top nove. Un derbi, de novo entre semana, que elevará as pulsacións de dúas afeccións irmandadas nunha das citas máis esperadas do curso. Para gañar en Ourense hai que loitar.
Na casa, os pupilos de Moncho López só caeron en dúas ocasións no que vai de Primeira FEB (ante o Fuenlabrada e o Guipuzkoa), mentres que sumaron oito triunfos. As súas batallas vencidas en territorio propio inclúen a xigantes caídos como Obradoiro, Estudantes, Alacant, Menorca ou Oviedo, todos candidatos á loita polo ascenso que claudicaron fronte ao poderío local.
O COB, liderado pola varita máxica de Rafa Lisboa, o acerto de Gabe Kalscheur, a forza do exnaranja Sexan McDonnell ou o poderío na pintura de Romaro Gill, buscará o desquite tras a súa derrota no Coliseum o pasado mes de decembro.
Naquel partido, marcado por unha grave intoxicación alimentaria no vestiario auriense durante a semana previa que apenas lles permitiu adestrar, o Leyma carburou ao ritmo de Paul Jorgensen e Dino Radoncic, dous das súas armas máis letais.
"O COB ten un equipol longo e utiliza a todos os seus xogadores, todo o mundo intervén. Están a xogar a un gran nivel», sinalou Carles Marco.
Moncho López destacou as virtudes dos coruñeses.
"É o equipo da Liga que xoga durante máis minutos ben".
O partido pódese seguir en directo ás 21:00 horas pola G2 e em AGalega.gal
