O IPC mantívose estable en febreiro no 2,3 %, pero a inflación subxacente escala ao 2,7 %

O Índice de Prezos de Consumo mantivo a súa taxa interanual no 2,3 % en febreiro, segundo os datos avanzados este venres polo Instituto Nacional de Estatística (INE).

O organismo estatístico explicou que neste comportamento afectou á baixa o descenso dos prezos da electricidade, que subiron en febreiro de 2025, e á alza, os combustibles e lubricantes para vehículos persoais, restaurantes e servizos de aloxamento e alimentos e bebidas non alcohólicas, cuxos prezos aumentaron máis que en febreiro de 2025.

Co mantemento do IPC interanual en febreiro ponse fin a tres meses consecutivos de baixadas.

O Ministerio de Economía, Comercio e Empresa destacou que España segue na senda de control de prezos marcada polo obxectivo do Banco Central Europeo dun crecemento próximo ao 2 %. "E esta moderación favorece que os salarios aumenten por encima da inflación, permitindo ás familias gañar poder adquisitivo", engadiu.

A suxacente sobe ao 2,7 %

O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en febreiro escalou unha décima, ata o 2,7 %, tras tres meses consecutivos no 2,6 %.

De confirmarse esta taxa do 2,7 %, a inflación subxacente alcanzaría o seu valor máis alto desde agosto de 2024, cando tamén foi do 2,7 %.

Os prezos soben un 0,4 % no mes

En termos mensuais (febreiro sobre xaneiro), o IPC subiu un 0,4 %, a maior alza mensual desde o pasado mes de outubro, cando aumentou un 0,7 %.

Pola súa banda, o IPC harmonizado (IPCH) incrementou unha décima a súa taxa interanual en febreiro, ata o 2,5 %, cunha variación mensual do 0,4 %. A inflación subxacente do IPCH estímase nun 2,8 % para o segundo mes do ano, segundo apunta Estatística.

O INE publicará os datos definitivos do IPC de febreiro o próximo 13 de marzo.