O fallo detectado nos A320 de Airbus ten un impacto limitado no tráfico aéreo

O tráfico aéreo sufriu un impacto limitado este sábado pola alerta lanzada polo fabricante aeronáutico Airbus sobre os avións da súa familia A320, a máis vendida do mundo.

A empresa anunciou que os sistemas de voo de máis de 6.000 aparellos deste modelo dun único corredor, para curtas e medias distancias, poderían verse afectados por unha exposición ás radiacións solares.

A maior parte das compañías afectadas procederon de forma rápida á actualización informática que aconsellou o construtor europeo. Porén, uns mil avións precisan cambios máis profundos polo que poderían quedar fóra da circulación varias semanas.

O ministro francés de Transportes, Philippe Tabarot, precisou na televisión BFMTV este sábado que o número de aparellos que finalmente van permanecer tempo en terra é menor e rolda o centenar. 

O aviso produciuse tras un fallo detectado nos sistemas de control dun avión da aeroliña estadounidense JetBlue entre Cancún e Newark, en Nova Jersey, o pasado 30 de outubro.

O aparello sufriu unha caída de altitude brusca que obrigou aos pilotos a efectuar unha aterraxe de emerxencia na cidade de Tampa, no estado de Florida.

A análise do persoal especializado revelou que o problema derivou dunha forte exposición dos sistemas ás radiacións solares, cunha intensidade non testada ata o momento, o que levou a Airbus a introducir estas modificacións.

Voos cancelados

Centos de voos canceláronse este venres, aínda que as aerolíñas puideron de xeito maioritario acomodar as pasaxes afectadas noutros voos, o que limitou o impacto real.

É o caso de Francia, onde Air France suspendeu 35 voos este venres e ten previsto facelo cunha vintena este sábado, sen que ningunha persoa quede en terra ao longo do día, cando se agarda que a situación volva á normalidade.

A alemá Lufthansa tamén actualizou os sistemas dos seus avións durante a noite e non prevé ningunha cancelación, pero non descartou atrasos nos seus voos.

Tamén recoñeceron un impacto limitado a portuguesa TAP, a británica Easyjet, a belga Brussels Airlines ou a suíza Swiss, que non cancelaron ningún voo, o mesmo que a española Iberia, cuxos técnicos traballaron toda a noite para proceder ás actualizacións requiridas.

Maior impacto fóra de Europa

Fóra de Europa o impacto foi superior. A xaponesa ANA cancelou 65 voos, a australiana JenStar un centenar, as filipinas PAL e Cebu Pacific 80 e a mexicana Volaris non precisou o número, pero anunciou suspensións e atrasos ata o domingo.

A colombiana Avianca, moi presente en varios países de América Latina, indicou que o 70% da súa frota debía someterse ás operacións de actualización, o que provocará "disrupcións significativas" nos seus voos, sen dar precisións.

Os equipos das aeroliñas traballan duro nos Estados Unidos para evitar que as operacións afecten os seus voos nunha fin de semana especialmente complicada polo gran número de voos que se agardan co gallo do día de Acción de Grazas.

As autoridades francesas, que xunto a Alemaña son os principais accionistas de Airbus, destacaron a reacción rápida do fabricante, que ao seu xuízo privilexiou a transparencia e a seguridade da pasaxeiros fronte ao golpe na reputación que poida ter ese incidente.

"Puxo de manifesto que a seguridade é a súa prioridade por encima da cotización bolsista ou de obter novos pedidos", dixo o ministro galo de transportes.