Estabilizan o incendio de Casaio e seguen activos os da Pobra do Brollón e Avión
En Ourense, o incendio de Avión chega ás 250 hectáreas e hai 10 incendios máis estabilizados ou controlados
Os efectivos conseguen estabilizar o incendio de Casaio
Pobra de Brollón e Quiroga: 900 hectáreas
Mellora considerablemente a situación dos incendios na provincia de Lugo. A Xunta levantou o nivel dous de emerxencia no lume que segue activo na Pobra do Brollón e Quiroga, e que está estabilizado en máis do 90 por cento do perímetro.
Mantense a vixilancia sobre algúns focos no lugar de Covas, en Quiroga, que hai que seguir refrescando. Xa non hai lapas, pero o terreo segue fumeando e hai que evitar que o lume se reavive.
Segundo as últimas estimacións da Xunta, o incendio arrasou en dous días unhas 900 hectáreas. Di o presidente da Comunidade de Montes de Augasmestas que é case o 90 por cento do monte de Quiroga e da Pobra.
A Fonsagrada: 40 hectáreas
Tamén mellora a situación no outro incendio activo na provincia de Lugo, o da Fonsagrada, que xa está totalmente estabilizado. As últimas medicións falan de 40 hectáreas queimadas.
Avión-Nieva: 250 ha
Desde as 17.09 horas do domingo está activo un lume no concello ourensán de Avión, parroquia de Nieva, que afecta unha superficie estimada de arredor de 250 hectáreas.
Para a súa extinción mobilizáronse polo de agora, de xeito acumulado, 5 técnicos, 32 axentes, 59 brigadas, 34 motobombas, 5 pas, 10 helicópteros e 8 avións.
Carballeda de Valdeorras-Casaio: 5.000 ha
Está estabilizado desde as 21.01 horas de hoxe o incendio do concello ourensán de Carballeda de Valdeorras, parroquia de Casaio, que se iniciaba ás 18.42 horas do luns 18. Segundo as últimas estimacións provisionais, este lume, que entrou en Galicia desde Castela e León, afecta arredor de 5.000 hectáreas.
Para a súa extinción mobilizáronse, de xeito acumulado, 10 técnicos, 56 axentes, 100 brigadas, 42 motobombas, 4 pas, 13 helicópteros e 11 avións.
Chandrexa de Queixa (Requeixo e Parafita) e Vilariño de Conso-Mormentelos
Desde as 13.01 horas deste luns, día 25, permanece estabilizado na súa totalidade o incendio de Chandrexa de Queixa (Requeixo e Parafita) e Vilariño de Conso (Mormentelos). Estes incendios comezaron en Chandrexa o venres 8, na parroquia de Requeixo, e o martes 12 na de Parafita. O xoves 14, reactivouse o foco do concello de Vilariño de Conso, parroquia de Mormentelos. Segundo as últimas estimacións provisionais, o lume afecta unha superficie de arredor de 19.000 hectáreas, parte delas tamén nos municipios de Manzaneda, Montederramo, A Pobra de Trives, O Bolo e Laza.
Para a súa extinción mobilizáronse de xeito acumulado, 23 técnicos, 182 axentes, 229 brigadas, 132 motobombas, 21 pas, 17 unidades técnicas de apoio, 34 helicópteros e 30 avións. Neste lume mobilizáronse efectivos da Unidade Militar de Emerxencias (UME).
Estabilizado Larouco-Seadur: 30.000 ha
Desde as 11.25 horas do sábado 23 permanece estabilizado o incendio iniciado o mércores 13 ás 18.55 horas no concello ourensán de Larouco, parroquia de Seadur, que afecta unha superficie estimada de máis de 30.000 hectáreas en territorio galego, no propio concello de Larouco e nos de Quiroga, O Barco de Valdeorras, O Bolo, Carballeda de Valdeorras, A Rúa, Petín, Rubiá, A Veiga e Vilamartín de Valdeorras.
Para a súa extinción mobilizáronse, de xeito acumulado, 54 técnicos, 245 axentes, 319 brigadas, 253 motobombas, 12 pas, 6 unidades técnicas de apoio, 15 helicópteros e 15 avións. Neste lume mobilizáronse efectivos da Unidade Militar de Emerxencias (UME).
Oímbra-A Granxa e Xinzo de Limia-Gudín: 17:000 ha
Este lume está controlado. O martes 12 iniciouse no concello ourensán de Oímbra, parroquia da Granxa, un incendio forestal que se uniu con outro rexistrado o pasado venres 15 ás 17:22 horas na localidade ourensá de Xinzo de Limia, Gudín. Segundo as últimas estimacións, este incendio afecta unha superficie estimada de 17.000 hectáreas, ademais de nas localidades de Oímbra e Xinzo de Limia, nas de Monterrei, Cualedro, Verín, Laza, Trasmiras, Castrelo do Val e Baltar. O foco iniciado en Oímbra-A Granxa deuse por controlado ás 22:55 horas do venres 22, e así súmase ao que xa fora igualmente estabilizado ás 02:45 horas do martes 19, correspondente a Xinzo de Limia-Gudín.
Para a súa extinción mobilizáronse, de xeito acumulado, 18 técnicos, 169 axentes, 228 brigadas, 147 motobombas, 6 pas, 8 unidades técnicas de apoio, 18 helicópteros e 34 avións. Neste lume mobilizáronse efectivos da Unidade Militar de Emerxencias (UME).
A Mezquita-A Esculqueira: 10.000 ha
Controlado o incendio do concello da Mezquita, parroquia da Esculqueira, que se iniciaba o martes 12 ás 21:20 horas. Segundo as últimas estimacións provisionais, afecta arredor de 10.000 hectáreas en territorio galego. Este lume afecta tamén aos municipios da Gudiña e Viana do Bolo; así como a territorio da provincia de Zamora.
Para a súa extinción mobilizáronse de xeito acumulado 8 técnicos, 53 axentes, 74 brigadas, 61 motobombas, 4 pas, 3 unidades técnicas de apoio, 11 helicópteros e 20 avións. Neste lume mobilizáronse efectivos da Unidade Militar de Emerxencias (UME). Tamén colaboraron nas tarefas de extinción medios terrestres portugueses.
Carballeda de Avia-Vilar de Condes e Beade-As Regadas: 4.000 ha
O venres día 15 ás 16.38 horas iniciábase o incendio forestal do concello ourensán de Carballeda de Avia, parroquia de Vilar de Condes. Ese mesmo día, ás 18.16 rexistrouse outro na localidade ourensá de Beade, parroquia de As Regadas. Os dous lumes uníronse nun só, que está estabilizado desde o xoves 21 ás 11.36 horas e que segundo as últimas estimacións afecta unha superficie de 4.000 hectáreas, parte delas nos municipios de Avión, Melón, Leiro e Ribadavia.
Mobilizáronse para a súa extinción, de xeito acumulado, 6 técnicos, 114 axentes, 192 brigadas, 110 motobombas, 4 pas, 2 unidades técnicas de apoio, 10 helicópteros e 12 avións.
Vilardevós-Vilar de Cervos: 900 ha
Está controlado desde as 14.56 horas de onte o incendio do concello ourensán de Vilardevós, parroquia de Vilar de Cervos, iniciado o mércores 13 ás 18.09 horas. Segundo as últimas estimacións, afecta unha superficie de arredor de 900 hectáreas.
Mobilizáronse para a súa extinción, de xeito acumulado, 3 técnicos, 23 axentes, 16 brigadas, 15 motobombas, 3 helicópteros e 7 avións.
Montederramo-Paredes: 120 ha
Continúa controlado desde as 22.05 horas do venres, día 22, o incendio forestal do concello ourensán de Montederramo, parroquia de Paredes, que se iniciou o luns 11 ás 04.50 horas e que segundo as últimas estimacións afecta arredor de 120 hectáreas.
Para a súa extinción mobilizáronse, de xeito acumulado, 2 técnicos, 6 axentes, 14 brigadas, 12 motobombas, 2 pas, 2 unidades técnicas de apoio, 7 helicópteros e 7 avións.
Maceda (Santiso e Castro de Escuadro): 3.500 ha
O domingo 10 e o martes 12 comezaron dous incendios forestais no concello ourensán de Maceda, nas parroquias de Castro Escuadro e Santiso, respectivamente. Ambos acabaron por unirse nun só lume que quedou controlado ás 19.52 horas do venres día 22. Segundo as últimas estimacións provisionais, este incendio afecta en conxunto unha superficie de arredor de 3.500 hectáreas, parte delas do municipio de Vilar de Barrio.
Para a súa extinción mobilizáronse de xeito acumulado 11 técnicos, 101 axentes, 157 brigadas, 88 motobombas, 11 pas, 3 unidades técnicas de apoio, 19 helicópteros e 18 avións. Neste lume mobilizáronse efectivos da Unidade Militar de Emerxencias (UME).
