O IBEX 35 perde os 17.000 puntos tras abrir cunha caída do 1 %, co petróleo xa en 102 dólares

O IBEX 35 comezou a sesión deste venres cun retroceso próximo ao 1 %, que levou o selectivo a perder a cota dos 17.000 puntos, nunha apertura marcada polos prezos do petróleo e a evolución do conflito en Oriente Próximo.

En concreto, o selectivo madrileño situouse ás 09.00 horas nos 16.973 puntos, co prezo do petróleo Brent, de referencia en Europa, subindo case un 1,8 %, ata os 102,24 dólares por barril. Pola súa banda, o barril de cru West Texas Intermediate (WTI), de referencia nos Estados Unidos, negociábase sobre os 97 dólares, cunha repunta do 1,46 %.

O prezo do barril de cru de calidade Brent superou onte a cota dos 100 dólares despois de que o novo líder supremo de Irán, o aiatolá Mojtaba Khamenei, se pronunciase a favor de seguir bloqueando o estreito de Ormuz como parte da estratexia do país persa en resposta aos ataques dos Estados Unidos e Israel. Hoxe, de momento, xa escalou ata os 102 dólares, a pesar de que amenceu lixeiramente por encima da cota dos 100 dólares.

Dentro do IBEX 35, todos os valores espertaban en negativo, salvo Repsol, que se revalorizaba un 1,7% ás 09:10 horas. Os maiores descensos sufríanos ArcelorMittal (3,38 %), Puig (2,56 %), Amadeus (2,47 %), Acerinox (2,15 %), BBVA (2,12 %), Santander (2,09 %) e Inditex (1,98 %).

As principais bolsas do vello continente tamén comezaron a sesión deste venres con caídas. O FTSE 100 de Londres cedía un 0,5 % e o CAC 40 de París un 1,2 %, mentres que o DAX de Frankfurt perdía un 0,7 %.

Onte, en Wall Street, o índice Dow Jones pechou cunha caída do 1,5 %, mentres que o Nasdaq acabou a xornada cun retroceso do 1,7 %.