Publicador de contidos

Publicador de contidos

O CHUAC estuda se o antiviral de Pfizer pode evitar contaxios

O CHUAC estuda se o antiviral de Pfizer pode evitar contaxios

Foron os primeiros en España en probar este uso e o resultado preliminar é satisfactorio

O paciente fora contacto directo dun positivo e non desenvolveu a infección despois de tomar o tratamento

 

G24.gal 24/01/2022 14:53

Paxlovid, o antiviral de Pfizer, xa demostrou que pode chegar a reducir ata o 90% o risco de hospitalización e morte por COVID. O que investigan agora no CHUAC é se este fármaco podería chegar a evitar que se produciran os contaxios.

"É un tratamento preventivo, doullo a un contacto estreito dun positivo confirmado e intento demostrar que non desenvolve a infección", explica Enrique Míguez, responsable da Unidade de enfermidades infecciosas do CHUAC.

Foran os primeiros en España en achegar un paciente para este estudo, que se desenvolve a escala mundial. Trátase dunha persoa non vacinada que tivera un contacto moi estreito cun infectado.

Dez días despois de tomar a pastilla, segue dando negativo. "Ponlle paus nas rodas ao virus, o que fai é impedir que se reproduza", engade o doctor Míguez.

Consideran precipitado sacar conclusións porque se trata dun estudo cego en que algúns pacientes reciben placebo. Pero de confirmarse a súa eficacia, estariamos, din, ante unha arma moi potente para frear as cadeas de transmisión do virus.

Míguez destaca que " é un complemento moi importante porque introduce unha ferramenta terapéutica que non tiñamos ata o momento"

Un complemento que lle pon as cousas moi difíciles ao virus nas primeiras fases da infección pero que, en ningún caso, estaría pensado para substituír as vacinas.

Publicidade
Publicidade
Publicidade