O helicóptero accidentado no río Hudson non tiña sistema de gravación de voo

O helicóptero que se estrelou o xoves no río Hudson , entre Nova York e Jersei City, accidente no que faleceron os cinco membros dunha familia de Barcelona e o piloto estadounidense, non contaba con sistemas de gravación do voo nin con cámaras, segundo informou a Xunta Nacional de Seguridade no Transporte norteamericana (NTSB) nas últimas horas.

A NTSB, encargada principal das pescudas para investigar o que motivou a perda da hélice do aparello e a caída da aeronave, detallou que non se recuperaron gravadoras nin información de carácter audiovisual de a bordo do helicóptero que poida axudar nesta investigación.

De feito, equipos de mergulladores continúan buscando no Hudson, onde se cre que aínda quedan partes da aeronave, incluíndo o rotor principal e o rotor de cola, afundidos,  aproximadamente, a 12 metros de profundidade. 

O venres, NTSB xa informou que barallan varias hipóteses pero que "se quere evitar a especulación" e que irán ofrecendo máis detalles sobre o proceso de investigación proximamente.

A busca de novas probas continúa este domingo con dezasete profesionais desta mesma entidade.