O Guardés, a encarrilar en Elx o seu pase á final polo título
O Guardés xa ten asegurada a súa presenza en Europa tras proclamarse campión da fase regular
O choque medirá ás dúas mellores defensas da liga
Foto Mecalia
O Mecalia Atlético Guardés buscará este mércores na pista do Balonmán Elx dar o primeiro paso cara á final do 'playoff' polo título da liga Guerreiras Iberdrola, no partido de ida dunha semifinal que se resolverá catro días despois en terras galegas.
Tras ter que remontar seis goles á Aula Valladolid na Sangriña na primeira eliminatoria, o conxunto dirixido por Ana Seabra encara un esixente exame ante un Elx que vén de derrotar con demasiada facilidade ao BM Porriño.
O Guardés, que xa ten asegurada a súa presenza en Europa tras proclamarse campión da fase regular, chega ao partido con confianza, pero tamén consciente de que deberá de minimizar os seus erros ante un rival que chegou no seu mellor momento ao tramo decisivo do campionato.
O choque, para o que Seabra ten a todas as xogadoras dispoñibles salvo Elena Martínez, medirá ás dúas mellores defensas da liga. Ademais, o Guardés deberá minimizar as súas perdas de balón para evitar os goles en accións de contraataque do conxunto dirixido por Joaquín Rocamora, ao que esta tempada gañou os dous partidos da fase regular.
