O gromo de salmonelose de Oza-Cesuras xa chegou a Asturias e a Castela e León
Os novos afectados encóntranse estables e ingresados
O gromo expándese xa por catro comunidades autónomas
O Servizo de Saúde do Principado de Asturias (Sespa) confirmou un caso de salmonela que está vinculado ao gromo orixinado no festival de Oza-Cesuras, na Coruña.
Fontes da Consellería de Saúde confirmaron que se trata dun paciente ingresado no Hospital Universitario Central de Asturias (HUCA), onde está estable.
A Xunta de Galicia xa confirmou que teñen coñecemento dun total de 150 casos confirmados por intoxicación alimentaria e non 162 como dixeron onte. Dese total, 41 afectados encóntranse ingresados, 36 en hospitais galegos.
O gromo relaciónase coa celebración do Trasan Fest en Oza-Cesures a pasada fin de semana, cita musical e gastronómica á que acudiron máis dun milleiro de persoas.
Entre os afectados, a maioría son xente nova, galegos ou doutras comunidades autónomas como Madrid ou Asturias. Entre os atendidos tamén se encontraban catro nenos e dúas embarazadas.
Novo caso confirmado en Castela e León
A Consellería de Sanidade de Castela e León confirmou tamén un caso de salmonela vinculado ao mesmo gromo na súa comunidade autónoma.
Ao igual ca o paciente de Asturias, este tamén se encontra ingresado e en estado estable.
Con esta, xa son catro as comunidades en que se atoparon casos de salmonelose relacionados co festival de Oza-Cesuras: Galicia, Madrid, Asturias e Castela e León.
