Varios afeccionados do Dépor, feridos pola rotura do valado da bancada

Minuto 90. Quiles marca o gol do triunfo para o Deportivo e vai celebrar o tanto co público deportivista que se achegara ao Ruta da Prata. Os seareiros véñense contra o valado, que cede, e uns corenta afeccionados caen ao foxo. 

Puido acabar en traxedia, pero, afortunadamente, só houbo un ferido de certa consideración, cunha fractura nunha perna, que tivo que ir ao hospital. Outros dous, con golpes no xeonllo e na clavícula, tamén foron atendidos no hospital da capital zamorana. Así o confirmou o xefe de prensa do Deportivo Gabi Barrós nos micrófonos da Radio Galega. O resto, atendidos polos médicos do equipo coruñés, tiveron contusións leves.