O Goberno quere prohibir o aumento do prezo na revenda de entradas

O Ministerio de Dereitos Sociais, Consumo e Axenda 2030 incluíu a prohibición do aumento do prezo na revenda de entradas no anteproxecto de lei de consumo sostible.

Na actualidade, xa está prohibida a utilización de bots para adquirir entradas de espectáculos culturais e posteriormente revendelas. Coa modificación actual impídese que nesa revenda se poida incrementar o prezo da entrada máis aló da variación do IPC desde o momento da compra inicial, segundo informaron fontes do Ministerio.

Agora, está prohibido que as empresas utilicen sistemas de bots para unha compra masiva de entradas destinada posteriormente á revenda. Así vén recollido no artigo 27.6 da Lei 3/1991, do 10 de xaneiro, de Competencia Desleal.

Esta prohibición foi incorporada á normativa española como transposición de directiva europea. A directiva europea di que debe prohibirse aos comerciantes que revendan aos consumidores entradas de espectáculos culturais e deportivos que adquirisen empregando programas (software) como bots que lles permitan comprar un número que exceda os límites técnicos impostos polo vendedor primario das entradas ou sortear calquera outro medio técnico empregado polo vendedor primario para garantir a accesibilidade dos billetes a todos os individuos.

"Esa prohibición enténdese sen prexuízo de calquera outra medida nacional que os Estados membros poidan adoptar para protexer os intereses lexítimos dos consumidores e velar pola política cultural e o acceso xeneralizado de todos os individuos a espectáculos culturais e deportivos, por exemplo a regulación do prezo de revenda das entradas", engade a normativa.

No ministerio avisan de que esta prohibición non está a funcionar: "Os grandes incentivos económicos que xera esta revenda por parte de empresas dificultan a súa aplicabilidade".

A través da lei de consumo sostible, o ministerio modifica o artigo 20 da Lei Xeral para a Defensa dos Consumidores e Usuarios para prohibir que a revenda poida incrementar o prezo da entrada máis aló da variación do IPC desde o momento da compra inicial ao momento da seguinte venda.

Esta medida busca atacar os incentivos económicos que hai agora na revenda para poder acabar con ela. É dicir, que a compra de entradas masiva a través de bots para despois vendelas a prezos desorbitados deixe de ser posible.

Do mesmo xeito que coa publicidade de pisos turísticos, a posta á venda de entradas en revenda cun prezo superior ao regulado convertería esta actividade en ilícita e poderíase instar ao bloqueo das páxinas web en que se estivese producindo a infracción e a consecuente sanción para o infractor.

Esta medida xa está prevista en normativas de países da contorna de España. En Bélxica, en virtude do artigo 5 da Lei do 30 de xullo de 2013 relativa á venda de entradas para eventos (Wet van 30 juli 2013 betreffende de verkoop van toegangsbewijzen tot evenementen), prohíbese a revenda habitual de entradas, a exhibición habitual de entradas con vistas á súa revenda e a provisión de medios que se utilizarán para a devandita revenda (artigo 5.1), sempre que non conten con autorización do organizador, e tamén a revenda ocasional de entradas a un prezo superior ao prezo orixinal (artigo 5.2).

Pola súa banda, en Francia, a revenda de entradas está regulada pola Lei n.º 2012-348 do 12 de marzo de 2012, que introduciu o artigo 313-6-2 no Código Penal francés. Esta disposición prohibe a revenda habitual de entradas para eventos culturais, deportivos ou comerciais sen a autorización expresa do organizador ou produtor do evento.

De acordo con información da compañía de investigación de mercados e consultoría Verified Market Research (Secondary Tickets Market Size, Potential, Market Share & Forecast), a proxección do valor do mercado de revenda de entradas en Europa para 2030 é duns 7.769 millóns de Euros, partindo dunha estimación de 1.817 millóns de Euros en 2024.

Tendo en conta que España representa habitualmente entre o10 % e o 15 % do mercado secundario europeo de tíckets, a evolución do valor deste sector en España será dos 322 millóns en 2024 a 932,3 millóns de Euros anuais en 2030.

Coa limitación do prezo de revenda por parte de empresas, unha parte moi importante deste importe permanecerá dispoñible para gasto por parte das familias, en lugar de estar destinado a unha actividade improdutiva que non achega valor engadido, apuntan no ministerio.