O Goberno propón un novo modelo de residencias máis pequenas e trato próximo

O Ministerio de Dereitos Sociais e as comunidades aproban este mércores o acordo de acreditación e calidade dos centros e dos servizos de atención á dependencia, no que se inclúe o novo modelo de residencias de maiores, máis pequenas e con coidados máis personalizados.

A ministra de Dereitos Sociais, Ione Belarra, preside o Consello Territorial de Servizos Sociais e do Sistema para a Autonomía e Atención á Dependencia que debate un documento consensuado na Mesa de Diálogo Social, con entidades sociais, sociedades científicas e profesionais, que deberá recibir o apoio das comunidades, que teñen a competencia das políticas sociais.

O novo modelo, impulsado polo ministerio de Belarra, fixa os criterios de atención a persoas maiores e dependentes en centros residenciais, de día ou atención domiciliaria, que deberán adaptarse ás necesidades de apoio de cada persoa e respectar a súa vontade, as súas preferencias e o seu estilo de vida.

Propón residencias con menos prazas, en zonas urbanas, con unidades pequenas de convivencia que compartan zonas comúns e maior número de cuartos individuais.

Pero tamén, aposta por reforzar a atención domiciliaria e os dispositivos de teleasistencia para que cada persoa teña os apoios que precise dentro da súa vivenda e da súa contorna comunitaria.

Algunhas comunidades expresaron as súas discrepancias con este novo modelo para o que reclaman maior financiamento. O seu presidente Emiliano García-Page (PSOE) opinou este martes que "este cambio de modelo importantísimo" pode traer como consecuencia pór en risco miles de postos de traballo vinculados sobre todo ao sector privado. 

 Galicia votará en contra por consideralo pouco realista e discriminatorio.