O Goberno promételle á OTAN que España terá 14.000 militares máis en dez anos
O compromiso de aumentar os efectivos do exército figura no Obxectivo de Capacidades que a OTAN asignou a España para a próxima década e que foi aprobado no pasado cumio da Alianza Atlántica
(Europa Press / María José López)
O Goberno comprometeuse coa OTAN a aumentar nun 11 % os efectivos totais das Forzas Armadas ata 2035, de forma que incrementará o seu persoal en 14.000 militares na próxima década, a metade no período ata 2029.
Segundo adiantou o diario El País e confirmaron á Axencia EFE fontes do Goberno, o compromiso de aumentar os efectivos nas Forzas Armadas figura no Obxectivo de Capacidades que a OTAN asignou a España para o período 2025-2035 e foi referendado no recente cumio da Alianza celebrado na Haia.
Os plans de aumentar os militares xa figuraban no Plan de Seguridade e Defensa presentado en abril polo presidente do Goberno Pedro Sánchez, quen avanzou, sen especificar o número, que no investimento total previsto de 10.471 millóns de euros se prevía este incremento.
De feito, o primeiro dos cinco eixos deste plan, dotado cun 35 % do gasto total, uns 3.600 millóns de euros, destinaríase a mellorar as condicións laborais da tropa e a mariñeiría, aumentar os efectivos das Forzas Armadas, actualizar os equipamentos e mellorar os sistemas de formación dos militares.
