O Goberno pacta unha subida salarial do 11% para os funcionarios entre 2025 e 2028
Acordo plurianual con incrementos fixos agás en 2026, cando haberá unha parte ligada ao IPC
A subida de 2025, do 2,5%, chegará en decembro con efectos desde xaneiro
O pacto inclúe melloras laborais como a eliminación da taxa de reposición
Arquivo
O Ministerio de Función Pública e os sindicatos UXT e CSIF pactaron un incremento salarial do 11% para máis de tres millóns de empregados públicos no período 2025-2028.
O acordo distribúe a suba nun 2,5% para 2025, un 1,5% fixo para 2026 con medio punto adicional se a inflación iguala ou supera esa porcentaxe, un 4,5% para 2027 e un 2% para 2028.
A subida de 2025 pagarase en decembro con efectos retroactivos desde o 1 de xaneiro. En 2026, o incremento adicional do 0,5% aplicarase no primeiro trimestre de 2027 se finalmente se cumpre a condición vinculada ao IPC. O resto das subas serán integramente fixas.
O pacto inclúe tamén cambios laborais, como a eliminación da taxa de reposición, a axilización dos procesos selectivos e o reforzo das unidades de atención ao público.
CSIF defende que o pacto é o mellor posible no actual contexto político e económico. O sindicato destaca que permite recuperar unha parte do poder adquisitivo perdido e poñer fin á conxelación salarial deste ano.
As partes crearán unha comisión de seguimento no prazo máximo de 15 días desde a firma do acordo. CSIF asegura que vixiará o cumprimento das medidas e que o pacto non implica un cheque en branco.
Para a secretaria xeral de UXT Servizos Públicos, Isabel Araque, trátase dun “gran acordo” no que non só gañan os empregados públicos, senón tamén a calidade do servizo.
Ademais do incremento salarial, Araque indicou que se acaba coa taxa de reposición, se garante que as ofertas públicas de emprego van remontar nun ano “e que a Administración está preparada para recibir o novo persoal e para impulsar a promoción de quen xa está dentro”.
