O Goberno de Murcia apunta a un cigarro como causa probable do incendio no hospital
O Executivo gaba o labor de bombeiros, persoal sanitario e traballadores, que desaloxaron e recolocaron a máis dun centenar de pacientes sen que se producisen feridos
EFE
O conselleiro de Emerxencias de Murcia, Marcos Ortuño, atribuíu este xoves a un cigarro mal apagado a orixe máis probable do incendio ocorrido na mañá do mércores no hospital Santa Lucía de Cartaxena, que non causou danos persoais e iniciouse na terraza dun dos seis módulos do complexo hospitalario.
A preguntas dos xornalistas na rolda de prensa posterior á reunión semanal do Consello de Goberno, Ortuño valorou a actuación dos bombeiros do parque municipal de Cartaxena, que controlaron as chamas á media hora de producirse, así como a resposta ante o incendio do persoal sanitario e resto de traballadores, que desaloxaron e recolocaron a máis dun centenar de pacientes sen que se producisen feridos.
Unha vez extinguido o incendio, axentes da policía científica da Xefatura Superior de Murcia asumiron a investigación dun lume que, para o goberno murciano, está relacionado co consumo de tabaco nunha contorna con prohibición expresa para facelo, o que motivou que se vaian reforzar as campañas informativas e os controis o cumprimento da lei antitabaco.
Un portavoz da Policía Nacional sinalou o a EFE que non se pode determinar ata o momento a causa que orixinou o incendio, e emprazou á comparecencia prevista para este mediodía do inspector-xefe do grupo de investigación de incendios da policía científica.
