O FMI rebaixa as previsións de crecemento global pola guerra comercial, agás en España

O Fondo Monetario Internacional (FMI) revisou á baixa as súas previsións de crecemento económico global como consecuencia do aumento da guerra comercial, que afectará negativamente ás cadeas de subministración e aos fluxos financeiros mundiais. A única excepción entre as principais economías é España, que crecerá un 2,5% en 2025, segundo o informe Perspectiva Económica Mundial publicado este martes.

A institución alerta dunha "desaceleración significativa" a curto prazo derivada da incerteza polos sucesivos aranceis anunciados por Estados Unidos e polas medidas de resposta de outros países. O FMI recoñece que o grao actual de integración económica amplifica os efectos negativos desta situación e dificulta a formulación de previsións precisas.

España resiste o impacto global

O informe sinala que, mentres o crecemento mundial caerá do 3,3 % en 2024 ao 2,8 % en 2025, España manterá un ritmo notable cun 2,5 %, tres veces máis que a zona euro (0,8 %) e por riba dos Estados Unidos (1,8 %).

O FMI atribúe esta fortaleza ao bo comportamento da economía en 2024 (3,2 %) e ao impulso das actividades de reconstrución tras as inundacións provocadas pola dina.

Correcións á baixa nos EUA, A China e Europa

Para os Estados Unidos, o FMI rebaixa nove décimas a súa previsión, ata o 1,8 % en 2025, e catro décimas en 2026, ata o 1,7 %, debido á maior incerteza política, a caída do consumo e o impacto dos aranceis.

Na zona euro espérase un crecemento do 0,8 % en 2025 e do 1,2 % en 2026, dúas décimas menos en ambos casos respecto ás estimacións de xaneiro.

A revisión afecta tamén as principais economías europeas: Alemaña non crecerá en 2025 e só medrará un 0,9 % en 2026; Francia crecerá un 0,6 % e un 1%, respectivamente; e Italia un 0,4 % e un 0,8 %. Estas cifras confirman a perda de dinamismo en Europa.

Freada en mercados emerxentes e Asia

Nos países emerxentes e en desenvolvemento, o FMI estima unha desaceleración ata o 3,7 % en 2025 e o 3,9 % en 2026. A China verá reducido o seu crecemento ao 4 % nos dous anos, medio punto menos do previsto, polo impacto dos novos aranceis. India tamén baixa ata o 6,2 % en 2025 e o 6,3 % en 2026.

México sufrirá unha contracción do -0,3 % en 2025 e crecerá só un 1,4 % en 2026, fronte ás previsións anteriores de expansión. Segundo o FMI, o baixo ritmo de reformas estruturais e outros desafíos manterán o crecemento global nun nivel "mediocre" nos vindeiros anos.

Previsións a medio prazo e comercio mundial

O crecemento mundial a cinco anos situarase no 3,2 %, por debaixo da media histórica do 3,7 % entre 2000 e 2019. Ademais, o comercio global tamén sufrirá: agárdase que o seu crecemento sexa do 1,7 % en 2025, 1,5 puntos menos do previsto en xaneiro, polas restricións arancelarias e a perda de impulso dos ciclos económicos.